Tambagi ko Noy Kulas: Nausab

Dear Noy Kulas,

Maayong adlaw ninyo. Tagoa lang ko sa alyas nga Jush. Minyo na ko ug duna nay mga anak nga naa sa college.

Naglibog ko kay di common ang akong problema. Wa ko mag expect nga mahitabo ni nako kay kaniadto di ko ingon ani mao nagminyo gani ko.

Nagtrabaho ko sa usa ka sales company. Akong trabaho nag- involved sa pagtagad sa mga kustomer aron ma convince mopalit sa among products. Usa sa among customers si Noel. Part sa among strategy mao ang pag-treat sa among clients. Mao ni nga nagkaila mi ni Noel.

Wa ko magdahom nga silahis siya. Diha na nako nahibaw-an sa usa namo ka lakaw diin mi nangahubog. Tungod sa akong kahubog, Noy, nadala ko ug nahitabo namong duha ang di angay mahitabo.

Kaingon nako dala ra to sa akong kahubog. Nahibung ko kay human ato sige naman mi og laag ug naa gyud mahitabo namo. Naglibog ko kay nagpangita na ko niya. Ngano kaha ko, Noy? Di ko maka imagine naingon ko ani. Ngano kaha ko? Unsa may akong buhaton?

JUSH

Jush,

So far, ikaduha or ikatulo na ka nako nga nagpadala og samang problema. Kana bang sa middle or later life diha ra nakasinati og ingon ana nga pagbati. Sa pagkatinuod lang, lisod pa kaayo tubagon kanang imong pangutana tungod kay di pa na common nga experience. Sagad sa silahis ug bayot nagsugod dihang bata or batan-on pa sila.

Duna hinuoy mga theory nga tungod sa mga pagkaon ug uban pang mga galamiton nato kada adlaw nga dunay sagol nga kemikal nga maka alter sa atoang lawas, mao na nga dunay mga tawo nga sama nimo, mibati na og gana sa sama og sex. Apan makonsiderar man gud ni nga mga hungihong lang, unless dunay mga study ug scientific proof una pa kini makompirmar.

Aron lang di ni mosamot, likayi na ang mao nga lalake bisan kon mag-crave ka sa inyong gibuhat. Basin karon siya pa, moabot unya ang panahon nga bisan kinsa na lang. Maglisod ka na unya og gawas. Kada hasmag sa craving, instead siya imong pangitaon, ibalhin ni ngadto sa imong asawa. Spend more time with her. Kana lisod tingali buhaton sa sugod, but ma-okay ra ka later.

NOY KULAS

(Alang sa imong probema, e-mail sa kulassuper@sunstar.com.ph