Tambagi ko Noy Kulas: Sakpan sa text

Dear Papa Joe,

Ako si Jierol, 33 anyos OFW. Naaghat ko ani og padala sa akong suliran para mangayo ko nimo og tambag para ma­ibanan ang sakit sa akong dughan.

Ani man gud ni akong partner nagtrabaho isip empleyado sa usa ka LGU sa north nga bahin sa Cebu. Kini siya akong partner. Naisyu sila sa iyang department head kay tungod kay nasakpan sa anak sa head nga nag text akong partner og ‘DY’ shortcut sa daddy.

Pwerte sukoa sa asawa sa head nag-chat nako, akong gi screen shot sa text. Ako gi confront akong partner ug iya kong gipasabot nga wrong send daw kay para daw to sa ako. Mao to nituo lang ko kay Dy ug My ang tawag namo sa akong partner.

Karong bag-o, nabuking na sad sila nga nag text akong partner sa iyang head og ‘ Yes, Dy, hapit na ta mag 1yr’. Mao gihapon nasakpan sa anak ug gi picturan ang text. Pero ang explanation sa akong partner kay mag one year na daw sila nga giisyu sukad nga nibuto ang una nga isyu. Kani dili naku katuo nga ang isyu ang gipasabot. Sakit kaayo kay nagsakripisyo ko diri sa abroad, pero nagbinuang akong partner.

Pwede ba ko makakiha nilang duha sa barangay para dili na mi maghilabatanay? Naa mi usa ka anak. Di pa mi kasal pero karon tuiga among plano ig-uli nako karong Marso. Ang iyang head pamilyado baya. Palihog tambagi intawon ko kay sakit kaayo sa dughan magsige kog hunahuna. Walay tarong tulog ug dili maka concentrate sa akong trabaho.

JIEROL

Jierol,

Technically, dalaga siya ug pwede siya magkipagrelasyon kay di man mo legal nga minyo bisan naa moy ana. Kon gusto ka, para naay legali­dad, ang asawa sa iyang head ang pakihaa nila para naay grounds kay naay ebedensya.

Ang paet nga mahitabo lang kay illegitimate inyong anak ug adto gyud na niya. Uli sa, unya pagsabot mo og maayo. Kay kong nganong iyang nabuhat, angay mong sayran? Naa ba siyay rason nganong nabuhat niya na.

PAPA JOE

(sa inyong tampo ipadala lang sa papajoesuperb@gmail.com)