Happy Valentine’s Day para ugma!

AC Martin

DUNA na say laing Cebuano songwriting contest ang ilusad nga giulohan og “Kanta Kasingkasing.”

Si Jude Gitamondoc, ang Bisaya hitmaker sa “Haha-Hasula”, ang organizer sa maong kumpetisyon nga matod niya mora kunog Himig Handog Love Songs.

Ang deadline sa submission of song entries karong Marso 30, 2018. Duna silay presscon karon, February 13, 11:30 am sa Handuraw Pizza Mango. Basin motambong sad ang apo sa tag-iya sa Viva Records nga usa sa mga nisuporta sa maong bangga.

Giklaro ni Jude nga naa pa gihapon siya sa Vispop pero kining “Kanta Kasingkasing” solo project kuno ni niya.

ST. Gallen

Nakurat ko pagsud nako sa sinehan sa “Meet Me In Saint Gallen” niadtong Sabado kay halos napuno ang balcony sa SM Cinema.

In fairness, cute kaayo silang Bela Padilla ug Carlo Aquino ug nindot ang ilang mga dialog labi na kadtong una silang nagkahimamat, kuha kaayo nila ang kiliti sa audience.

Unique ang iyang pagka-romcom kay dili tradisyonal ang ending nga sagad natong makita sa mga mainstream movie. Natural ang ilang acting ug maorag mada ka sa ilang lovestory.

Nindot sad pagkasuwat mao tingali daghang nanan-aw bisan P220 ang pulta. Bisan indie film ra siya.

Valentines

Karong Valentines day, siguradong magpista ang mag-date sa mga sinehan kay duha ka tagalog nga pelikula ang dungan nga ipasalida.

Ang sexy movie nga “Sin Island” nilang Coleen Garcia, Nathalie Hart ug Xian Lim ug ang pang-teenagers nga “My Fairy Tail Love Story” nilang Janella Salvador ug Elmo Magalona.

Lain-lain siya og market pero pareho nakong feel tan-awon ang duha. Kuwarta ray kuwang.

Ngano niladlad?

Duda ko na-influence ni si Mark Bautista sa mga celebrity sa Hollywood. Di ba uso ron sa Hollywood ang moladlad, sama nilang Kevin Spacey, Daniel Newman ug Aaron Carter.

Sa akong nahibaw-an duna pay daghang bading ang showbiz pero gipugngan lang sa ilang management. Siyempre duna silay image nga giprotektahan aron magpabilin silang humot sa publiko ug advertisers.

Simple

Valentines na man gyud, kahinumdom ko sa estorya sa akong lola sa una nga dili kuno mangitag uyab nga sobrang brayt kay lisud espellingon. Dili sad kuno kanang guwapa kay taas og pride.

Unsa man diay akong pilion `la? Ang iyang tubag kanang simple because simple is beautiful.

Bitaw, kanang uyab mailisan ra, pero ang mga ginikanan dili na. Dili sad nato kalimtan ang atong mama ug papa karong Valentines. Atong ipabati nila ang pagmahal sa nahibilin nilang katuigan sa kinabuhi. Happy Valentines!