Tambagi ko Noy Kulas: May katungod ba ko?

Dear Papa Joe,

Tagua lang ko sa ngalan nga Jose, 38 anyos, lumad nga taga Lapu-Lapu City. Minyo na ko ug naa koy duha ka mga anak. Nagtipon mi sa akong mama og puyo sa ilang balay kauban sa ang akong duha ka mga igsuong babaye. Patay na akong papa, taudtaud na.

Ang akong suliran kabahin karon sa away namo sa among pamilya. Nasuko man gud akong asawa nga gikusi sa akong manghod nga babaye among anak kay gigisi iyang notebook, 15 anyos ni akong manghod ug 10 anyos ang akong anak nga lalake. Nidako ang away namo kay niapil ko kay wa ko kauyon nga gikusi ang among anak ug nalaparo nako akong manghod. Didto niapil si Mama ug iya na hinuon ming gipalayas. Ako siyang giingnan nga nganong molayas ko na may katungod man ko aning balaya. Ingon siya maayo pa paabangan niya ang kwarto namo makakwarta pa siya kay kami apil daw mi nga gasalig sa pension sa akong papa kay wa daw koy tarong trabaho.

Di ba naa man koy katungod aning balaya kay kama­guwangan ko? Unsa may buhaton nako? Tambagi ko.

JOSE

Jose,

Haay naku, Dong, mag Pasko na, gipadako pa ninyo ang away. Katungod? Syempre naa kon wala na imong duha ka mga ginikanan, kamo nga managsuon naay katungod. Pero buhi pa ang imong mama, simple 123 ra na, conjugal property na nila ni papa nimo. Kon ikaw naay motor unya moingon ang imong mama nga ipagamit niya sa lain kay unsay imo, iyaha sad, okay lang ba nimo? Kinsa tong pinakaduol nimo, mao nay barugi in behalf.

Di gyud maayo ba nga mangipon. Busa paninguha para makalahi mo ug walay samok. Pero kon wa pa kay igong kwarta, tas-an nato ang pasensya.

PAPA JOE

(sa inyong tampo ipadala lang sa papajoesuperb@gmail.com)