Pia isip program host ug artista

Roger Serna

SA mga debotos sa Mahal nga Birhen Maria, mga panghinaut sa usa ka makahuloganong pagsaulog sa pista sa Birhen sa Inmaculada Concepcion.

Malipayong pagsaulog sa pista sa mga lungsod sa Oslob ug Tudela. Hinaut nga malinawon ug malampuson ang kalihukan.

● ● ●

Karong gabii ang pagpili ug pagkorona sa bag-ong Ms. Oslob. Pulos maanyag ang 11 ka kandidata. Tulo niini ang napili nga nipakita og nindot nga abilidad niadtong Dominggo apan usa lang kanila ang mapiling Ms. Talent.

Siya kaha usab ang makoro­nahan nga Ms. Oslob o usa sa walo nga wala mapilii ang abilidad? Mamatikdan kaha ang iyang kaanyag sa Binibining Ce­bu sa sunod tuig kon moapil man?

Duna koy duha nga gituohang maoy magtigi sa paglangkat sa korona pero di lang ko mag-tell kinsa. Anà!

Sa laing bahin, pili-on usab ang Festival Queen ugma gikan sa 11 gihapon ka mga kandidata. Lahi sa Ms. Oslob ang mga sumbanan sa pagpili sa Festival Queen ug usa niini, gawas sa kaanyag, ang pagka maayo niining mosayaw.

Kinsa sab kaha ang palarang kandidata?

● ● ●

Human sa pagtambong sa mga Christmas party sa Aboitiz Group of Companies, Smart Communications ug Globe Telecom diin minor prizes ang atong nadaug, ni-post ko sa Facebook og #notmytime.

Pero way seguro, dunay nag­pa­abot nga dako sa unahan. Kon sa Inengles pa, I’ll cross my fingers.

● ● ●

Salamat sa ABS-CBN Cebu pinaagi ni Adrian Diongzon, nakatan-aw ko sa konsertong Divas. Way duda, pulos maa­yo ang nanganta: Jaya, KZ Tan­­­dingan, Kyla ug Angeline Quinto.

Ang ako lang wa masabti, ang pagpili nila sa ilang mga gisul-ob. Sa pagsugod, morag nagsalbabida si KZ. Sa ikaduhang paglugwa ni Kyla, mora kinig moapil sa Moriones Festival.

Nag-gown man tinuod si Angeline sa iyang unang paglugwa ug sa finale, pero morag para sa pagpaso sa red carpet ang maong mga gowns. Mao gihapon ang kang Kyla.

Si Jaya, morag moapil og karate tournament. Ang guest nga si Erik Santos, morag budbod sa kahuot sa karsones ug suit. Nagbuotbuot ra to sila sa ilang gisul-ob? Pastilan!

Nawani sila sa laing guest nga si Anna Fegi-Brown sa panapot ug hasta sab gani sa kinantahay.

● ● ●

Pasado alang nako si Ms. U 2015 Pia Wurtzback isip host sa It’s Showtime. Pasado sab kaha siya isip artista?

Kauban si Pia ni Vice Ganda ug Daniel Padilla sa entry sa Star Cinema sa Metro Manila Film Festival. Unsa kahay iyang ipakita dinhi? Atong atangan.