Talk to Papa Joe: Di na moangkon

Dear Papa Joe,

Tawga lang ko sa ngalan nga Luz, taga Duljo Fatima, 19 years old pero gatrabaho ko sa Colon isip tindera. Ang akong problema karon kay mabdos ko pero dili angkunon sa amahan kay imposible daw nga ka usa ra man ko niya nahilabtan ug di na daw ko virgin.

Usa man ni siya ka deejay sa diskohan unya kani laging mangangha ka sa kasikat niya sa mga tawo, nalipay sad kaayo ko nga iya kong gicharcharan pero niabot sa punto nga sa likod sa ilang mga sounds, naay kinawatkawat nga panghitabo.

Nakainom sad ko ato mao nga wa ko kabalibad. Karon wa ko magtuo nga mabdos ko ug tulo na ka buwan pero ako siya gisudyaan di man gyud siya moangkon. Mao ni ang akong suliran karon. Palihug tambagi ko.

LUZ

Luz,

Well, mao nay giingon nga kinahanglan barugan nimo ang imong obligasyon anang bataa puhon bisan di pa moangkon nimo ang lalake. Kinsa man say lalake nga moangkon dayon nga wala man gyud sad siya kaila nimo? Malay ba niya og ing ana gyud ka magpahilabot sad dayon, di ba?

Basin lawasnong kalipay ra gyud ang giapas niya nimo. Mao lagi na, kapila mobadlong ang mga maguwang ninyo og edad pero ipalapos na man sa pikas dunggan. Unya kon moresulta, anha na magmahaymahay.

Siguro inig katawo anang bataa mausab pa tanan labi na og maliwat niya. Ang importante lang sad mao nga nakadumdum ka o naa kay contact niya puhon para iyang masuportahan iyang anak bisan di siya mopadayon nimo. Sa pagka karon, palig-on sa. Daghang salamat.

PAPA JOE

(sa inyong tampo ipadala lang sa papajoesuperb@gmail.com)