Beijing Road

Roger E. Vallena

DI ba naghisgot ko parte sa Guangzhou City sa akong mi­aging column? Unya kada bisita nako og laing lugar moobserbar ko sa kahimtang sa trapiko. Magpangutana ko parte sa kahimtang niini.

Sa pagsulod pa lang namo sa siyudad gikan sa Baiyun International Airport, ang ilang expressway akong naobserbahan nga di kaayo huot og trapiko. Lahi sa Malaysia diin taas kaayo ang linya bisan sa ka lapad sa dalan. Alang nako, mas maayong pagkaplano ug pagkadesinyo ang ilang road networks.

Kadaghanan sa ilang mga sidewalk lapad usab. Tumbas kini og duha ngadto sa upat ka mga lane sa atoang mga karsada dinhi.

Di lang gani mga tawo ang mosubay niini. Naay mga biseklita ug e-bikes nga managan. Ang ila usab nga mga biseklita ug e-bikes, way gilakip sa traffic rule. Makapadagan sila bisan go or stop, apan sa ila ra usab kini nga risgo. Ang nakalahi lang kay di kaayo grabe mopadagan ang mga sakyanan didto sa ilang kadalanan.

Tagsa ra ko nakadungog nga dunay nagbusinahay nga mga driver sa dan. Bisan gagmay nilang mga dan, wa ko kabantay nga nabara og dugay ang ilang trapiko.

Way sakyanan

Duna silay gitawag og Beijing Road nga usa ka shopping strip sa siyudad. Naa didto ang mga shopping mall nga anaa ang Western brands. Way sakyanan nga gitugtan nga makasulod sa mao nga dan nga lapad usab kaayo. Sa unahan lang nga junction roads kutob ang mga sakyanan.

Dinhi sa atoa, nagplano si Mayor Tomas Osmeña nga himuon nga carless ang dan Colon. Di usab niya pasudlan. Apan unsa may naa sa dan Colon?

Nindot unta kon i-makeover ang dan Colon aron mahimo kining presentable. Sa pagkakaron gud, ngil-ad kaayo kining talan-awon kay mobaha ang mga sidewalk vendor sa gabii. Moukopar na kini og katunga sa lane sa labing karaan nga karsada sa nasod.

Hawanan

Kon himuon man gani ang plano, mas maayong usbon ug limpyuhan ang mao nga dan.Ayuhon ang daan na kaayong mga edipisyo ug hawanan sa mga sidewalk vendor. Di sila kulban kun, kon di, ibutang og hustong dapit nga di makababag sa agianan sa publiko.

Kaanindot kon mahitabo kini. Apan matod sa usa ka negusyante nga akong naestorya, gasto kuno kaayo. Ngano diay, di diay gastuhan ang ka­lamboan?