Tambagi ko Noy Kulas: Mubo ra og lanat

Dear Noy Kulas,

Tawga lang ko og Kilat kay mao ni ang tawag sa akong mga barkada nako kay dali ra ko makauyab. Ug mao ni ang akong problema.

Sa akong edad nga 33, at least 20 plus na ang akong nauyab. Dali ra kong sugton sa girls kay di panghambog maayo sab ko og nawong. Di na maoy akong problema. Ang akong problema kay dali ra kong biyaan sa babaye. Ang pinakadugay, Noy, 3 months ra. Nahibung ko kay di magdugay ang akong mga relationship bisan majority nila akong nakuha.

Naglibog ko nganong ingon ani ang akong mga uyab. Unsa kahay apan nako? Akong mga amigo igo rang mokatawa kon mangutana ko. Unsa kahay rason ani?

KILAT

Kilat,

Basin pareho ka sa ubang mga lalake nga conceited hinungdan ma turnoff ang babaye. Niingon kang gwapo kaayo. Bitaw, nindotan ang babaye sa gwapo, pero ang molungtad gud sa relasyon mao ang character sa tawo. Mag-unsa nang gwapo pero wa kay ayo ikakuyog kay pulos na lang ka hambog, sobrang bilib sa sarili. Di ganahan ang babaye niana kay maghatag kana kanila og impression nga gibugoan ka nila.

Bitaw, ang mga babaye mas ganahan sa lalake nga gustong makaila nila. Kanang mopakita og interest kon unsay ganahan nila. Kana man gud sign na nga ang lalake o babaye nahigugma. Apan unsaon sab ning ubang mga lalake, nasobraan na sa bilib sa ilang kaugalingon nga magsige na lang og estorya parte sa ilang pagkatawo bisan ang babaye nakaklaro or nakaila na nila.

Usba ang imong diskarte kon ingon ana ka nga pagkatawo. Show interest sa pagkatawo sa imong girlfriend. Ayaw nang ikaw ang magsigeg paila sa babaye.

Gawas niana, basin seloso ra sab ka kaayo. Lain nang maka turnoff sa tawo kay kapoy sab nang nasobraan ra sa ilang kaugalingon to the point nga maora nag matuok o mahiktan ang imong partner. Indikasyon na sa kakuwang sa pagsalig nga maoy hinungdan nga maguba na hinuon ang relasyon.

Kon naa ka man ining duha ka mga taras o bisan usa man, pag-usab na kay di kana makaayo nimo kon ikaw naglantaw sa malungtaron nga relasyon.

NOY KULAS

(Alang sa imong problema, e-mail sa kulassuper@sunstar.com.ph ug rojval69@yahoo.com)