Sugilanon: News reporter

Fredrick F. Gelbolingo
121 Prenza, Argao, Cebu

ADUNA na poy pinatyanay nga nahitabo sa Brgy. Ligapa. Ikaupat na kini sa mga nagsunod nga ma adlaw. Sukad pagsugod ni Ayok sa iyang trabaho isip news reporter. Ning higayuna siya nay gipasulong sa ilang labaw sa maong area. Kay iyaha nag pamalibad ang mga kauban niyang mga karaan ug tang-an nang mga magsisibya uban ang ilang makantalitahong mga pahiyom nga mitan-aw kaniya.

Wa lang sab mobalibad si Ayok. Abtik siyang migawas sa ilang estasyunan ug misakayg dyip. Mao man gyud kuno kining bag-o ta, suwayan ta hangtod asa kutob ta makaagwanta, matod niya sa kaugalingon.

Kilumkilom na. Naabtan ni Ayok nga nag-utnga ang biktima nga gialirungan sa mga lumolupyo sa maong dapit. Wa pay laing mga reporter nga miabot gikan sa kaatbang nilang mga estasyunan sa radyo. Diha ang mga opisyal sa barangay, lakip ang mga barangay tanod.

“Unsa may hinungdan sa ilang away, Sir, nga misangpot man ni sa kamatayon ning biktima?” pangutana ni Ayok. Gitubag lang siya sa kahilom, siga sa mga mata, lingulingo, muro-muro sa mga nawong sa mga lumolupyo. Ang iyang pangutana gitubag sa barangay tanod pinaagi sa pagtudlo niini sa tawo nga morag si Einstein, nga mao diay ang kapitan ning lugara.

Giduol ni Ayok ang kapitan ug gitunolan dayon sa mikropuno. Giusab niya paglitok ang iyang pangutana ganina sa tanod. Ang tubag sa kapitan nakapahikurat kaniya.

“Ha? Mao ra nay hinungdan, mao ra nay hinungdan, Kap? Patay dayon?” ni Ayok nga nagsiga ang mga mata.

“Oo,” kalmang tubag sa kapitan.

“Unya, kadtong unang nahitabo nga pinatyanay, unsa man poy hinungdan adto, Kap? Hasta tong ikaduha ug kadtong ikatulo?” ni Ayok. Naminaw siya sa tubag sa kapitan.

“Ha? Gagmaya ra gog mga hinungdan! Naghunosay dayon sila sa ilang kinabuhi?” ni Ayok nga labi pang nahikurat.

“Lagi. Unya, dili kay upat ray patay sa nagsunod nga mga adlaw. Suma sa imong nahibaw-an, ang nahitabo nga patay ning among lugar, kon dili kada adlaw gyud ni mahitabo nga puro gagmay ra ang hinungdan. Mao bitaw nga kining among barangay Ligapa gihatagan og bag-ong ‘meaning’ karon, morag binuang!” matod sa kapitan nga nasubo ang pamayhon.

“Unsa ang imong gipasabot, Kap?” ni Ayok nga nakuryuso.

“Kuan... LI-gas GA-may PA-tay!

Nabatyagan ni Ayok nga inanay nga mikurog ang iyang mga tuhod sa nadungog niya gikan sa kapitan. Daw dili na gani niya kini malihok sa paghinunahuna sa iyang kaugalingon nga mag-amping nga di siya maligas bisag gamay lang ning dapita. Namatyagan niya nga nagsuhag ang iyang gininhawa. Kakuyapon siya. Ug nakuyapan gyud siya.

Nahigmata si Ayok sa pukaw sa iyang Mama.

“Uy, Ayok! Mata na! Unang adlaw ra ba nimo karon sa imong ‘duty’ isip ‘news reporter’ sa Station DYYD!” ni Mama niya nga miuyog sa iyang abaga. (Katapusan)