Bb. Cebu halos P1-M ang premyo?

Philip A. Cerojano

UNSA ka tinuod nga kaupat pil-a ang cash prize sa labing unang Binibi­ning Cebu kon itandi sa Binibining Pilipinas nga sugdan karong Agusto 19 ning tuiga?

Giingong mokabat sa P500,000 nga ganti ug laing P300,000 (in kind) ang madawat sa unang Bb. Cebu 2017 winner nga salmotan sa 44 ka lungsod ug walo ka mga siyudad sa Sugbo.

Ang screening sa mga kandidata sa Bb. Cebu ipahigayon karong Agusto 4 nga pasiugdahan sa Sacred Heart School batch 1985.

Ang coronation night ipahigayon karong Oktubre 28 sa Grand Ballroom sa Waterfront Cebu City Hotel and Casino.

Sila si Cary Santiago ug Kenneth Cobonpue ang nangusog niini ug gipaluyohan sa SHS batch '85, diin usa sa inila nga sakop sa maong grupo mao si Secretary Michael Dino sa Office of Presidential Assistant for the Visayas (OPAV).

Matod ni Dino nga mogasto ang organizer sa Bb. Cebu og P15 milyones ngadto sa P20 milyones kansang pundo gikuha gikan sa ilang mga sponsor ug walay kwarta gikan sa gobiyerno.

Ang mga kwalipikasyon sa kandidata naglakip sa mga mosunod: Filipino o half-Filipino; natural born woman; must be 18-26 years old; at least 5'5” in height; ug dapat suhito sa festival, products, tourist spot sa lugar nga iyang girepresentahan.