Gold alang kanimo Pa: Jeremy, 15

VIGAN CITY, ILOCOS SUR - “Hunahuna nako para ni sa akong papa.”

Mao ni ang gibutyag ni Jeremy Tanudra, 15, human siya maka-gold sa Palarong Pambansa 2018, usa ka adlaw human mitaliwan ang iyang amahan.

Si Tanudra kinsa usa sa atleta sa Central Visayas Regional Athletic Assocation (CVIRAA) nakasungkit og medalya niadtong Lunes sa Secondary Blitz sa chess team, uban niini si Chris Aldritz Pondoyo.

Abril 6, dihang naaksidente ang amahan niini sa motorsiklo sa lungsod sa Malabuyoc, diin usa kini ka trainer sa chess sa usa ka tunghaan sa Alegria.

Usa ka adlaw sa wala pa sila molarga paingon sa Vigan City, dili unta gusto nga mobiya si Jeremy aron siya mismo ang mobantay sa iyang amahan sa tambalanan.

Nag-inusarang anak si Jeremy, diin sa abli klase tinun-an na siya sa grade 11.

Gold medalist usab si Jeremy sa 2014 Palaro, diin n iadtong higayona kuyog niya ang iyang amahan nga si Vic Mil kinsa maoy ilahang coach.

Nagpangedaron pa ni og 5-anyos dihang nagsugod siya og duwa og chess.

Lumad sa Barangay Pasil, dakbayan sa Sugbo sila si Jeremy, ang apelyedo sa iyang mama ang iyang gigamit imbes Pepito, nga apelyedo sa iyang amahan.

Kagahapon, padayon ang pagkigkombate ni Jeremy tungod kay tanang medal nga iyang makuha karong Palaro, iyaha kining gihalad sa iyang amahan.

“Ako gyud silang gidasig taman sa akong makaya kay dili baya lalim ang nahitabo sa akong player, hilabi nga namatay ang iyang papa bag-o lang gyud,” matod ni Johnny Wellem Carzano, ang coach ni Jeremy. (HBL)