DH25 Training Camp sa Pope John gym

SA makausa pa, mopahigayon na usab sa ilang tinuig nga training sa mga kabatan-onan ang DH25 Basketball Camp karong Mayo 20-28 diha sa Pope John Seminary Cebu sa barangay Mabolo, dakbayan sa Sugbo.

Kini maoy gipahibawo ni Dondon Hontiveros, ang giilang Cebuano Hotshots sa PBA, kinsa maoy tag-iya ug training director sa maong camp.

Matod ni Hontiveros nga aron paglikay sa traffic sa Basak, Mambaling, Labangon ug Punta Princesa ug paghatag sa kasayon sa mga gustong mosalmot sa nahisgutang Training Camp adto na kini nila ipahigayon sa Pope John Seminary Cebu sa Mabolo.

Sa niaging mga katuigan, ang maong training camp didto himuon sa Don Bosco Technical School sa Punta Princesa ug sa USJ-R Basak Campus.

Ning higayona, si Hontiveros mipasalig nga full-time nga anaa na siya sa camp ug sa samang higayon mga bag-ong pamaagi sa training maoy iyang itudlo sa mga bata.

“Rest assured nga naa na gyud ko permi sa camp kay wala na koy commitment this time. Human na man ang ABL aning mga panahona. Nya matudlo na sab nako ang among gipangbuhat niadtong sa Alaska pa ko ug sa uban nakong nakat-onan sa akong pagka professional player.

Human sa mga drills, adunay duha ka adlaw nga mini tournament nga ipahigayon ang tanang campers.

Ang registration fee mokantidad og P3,000 diin libre na niini duha ka upper uniform, bola ug ingon nga gift packs gikan sa mga sponsors.

Samtang sa Mayo 30 ngadto sa Hunyo 3, ipahigayon usab og mini tournament ang DH25 alang sa 18-under, 15-under ug 13-under.

Alang sa dugang detalyi, mahimong motawag o mo-text ni coach Mario (09326182803) ug ni Voltaire (09957298928).

Subay niini nakahan-ay na sunodsunod nga basketball camp ug mini tournament nga pagahimuon sa DH25 sunod buwan.

karong Mayo 5-9, ang DH25 motadlas ngadto sa Valencia, Bukidnon ug dayon moderitso kini sa Mayo 10-14 sa Fil-Oil Flying V Arena sa Davao.

Sa petsa 15-19, molabyog kini ngadto sa Almeria, Biliran, Leyte ug sa petsa Mayo 20-28 mobalik kini dinhi sa Sugbo alang sa naandang usa ka semana nga training camp. (PR)