Adlawan hari sa Ornopia Motocross

GIPAKITA ni Jonjon Adlawan kon nganong usa siya sa gikonsiderar nga labing maayong rider sa Sugbo sa iyang paglangkat og duha ka mga titulo sa 20th Ornopia Motocross Cup niadtong Dominggo sa international standard racetrack sa Barangay, Calambua, San Remigio, Cebu.

Gawas kang Adlawan, mihimo sab og grabeng langas si Denmark Supatan sa iyang paghari sa laing kategoriya.

Si Adlawan, kinsa kanhi Rider of the Year sa lumba nga gipasiugdahan sa MS Motosuit ni Lou Ornopia, nipatigbabaw sa expert ug pro open categories.

Gilupig ni Adlawan sa expert category sila si Supatan ug Jelo Loenardo samtang iyang gibuntog sila si Venil Abellar ug Paulo Inoc sa pro open event.

Si Supatan mibawi sa iyang kapildihan ni Adlawan pinaagi sa paglangkat sa titulo sa intermediate class diin iyang gilupig sila si BJ Pepito ug novice production winner Erljun Codiñera.

Ang beteranong si Pepo Rubi nipakita nga aduna pa siya’y ikabuga pinaagi sa pagdaog sa veterans class ug Executive A divisions.

Ang ubang mga ningdaog mao sila si Ayen Ledesma sa executive B category, Ani En riquez sa executive C, Cyrill Tariman sa locan enduro, Dongkey Sanchez sa open enduro, John Vergel Hisoler sa beginners production, Jaime Ponce sa elite class.

Ninglampos sab sila si Terrence Codiñera sa mini class 65, Sharlet Gallarde sa mini class 85cc, Pankoy Pepito sa buggay, RK Cuesta sa ladies 12-under, Jomar Villaban sa underbone ug Jeanette Olanda sa peewee 50cc.

Ang lumba, nga tipik sa mga kalihukan sa piyesta sa Calambua nga agi’g pahinungod sa ilang mahal nga patron San Vicente Ferrer, giabagan sa F&FO motor parts, RMO motor parts, N Style, JCO motor parts, Prospeed, Motomaze, Aike MC parts, MS Apartelle, SNR MBJ Motomaze, NF Enterprises, Olilab Oil, Cebu Newstar, ug Petron Oil.

Nahimo kining posible sa suporta nila ni Benhur Salimbangon, provincial board member Sun Shimura, vice mayor Al Pestolante, Engr. Susan Ornopia Aroa, Diosdado Navarez, Lenley Concillado, Rowena Jubay, ug Ani Navarez. (ESL)