Alab Pilipinas mitaktak sa ABL defending champion Hong Kong Eastern

GIPABAKWIT sa host San Miguel Alab Pilipinas ang defending champion Hong Kong Eastern pinaagi sa pagrehistro og 79-72 nga ka­daugan aron pagkomple­to og two-game sweep sa ilang semi-finals series sa Asean Basketball League (ABL) sa miaging gabii sa Santa Rosa Multi-Purpose Complex sa Laguna.

Ang Alab Pilipinas nagpauwan og three-poiint shooting sa hinapos nga bahin sa 2rd quarter ug sayong bahin sa 4th quarter aron paghimo’g hawan nga agianan paingon sa kadaugan nga nagpahiluna kanila sa finals.

Ang Alab Pilipinas maoy ikalimang team sa Pilipinas nga nakasulod sa ABL finals sa walo ka mga tuig nga kasaysayan sa liga.
Katapusang nakasulod sa finals ang Pilipinas unya nahimo pang kampiyon niadtong 2013 dihang gisiruhan sa San Miguel Beer ang Indonesia Warriors sa finals sa series.

Ang maong SMB squad, nga maoy nagrepresentar sa Pilipinas niadtong higayuna, gipa­ngulohan nila ni Asi Taulava ug sa Sugbuanong higante nga si JuneMar Fajardo, kinsa kasamtangang four-time MVP sa Philippine Basketball Association.

Ang import sa Alab Pilipinas nga si Renaldo Balkman nimugna og unom ka sunodsunod nga puntos sa dayong paghuman sa 3rd quarter unya gisumpayan kini og su­nodsunod nga three-pointers nila ni Ray Parks, Justin Brownlee ug Pao Javelona sa sayong bahin sa 4th quarter alang sa 16-5 run.

Ang maong pagsutoy sa o­­pensa sa Alab Pilipinas nakahatag kanila og 69-51 nga labaw sa nahabiling 8:16 minutos.

Wala na motugot ang Pilipinas nga makasikit pagbalik ang Hong Kong hangtod na sa katapusang gutlo.

Ang Alab Pilipinas maghuwat na lang sa modaog sa laing semi-finals series tali sa Chong Son Kung Fu sa China ug Mono Vampire sa Thailand.

Puntos matag usa

Alab Pilipinas (79) - Brownlee 22, Balkman 21, Parks 13, Javelona 11, Raymundo 6, Alabanza 4, Domingo 2, Hontiveros 0, Sumalinog 0, Urbiztondo 0.

Hong Kong (72) — Elliott 25, Standhardinger 16, Moss 15, Lamb 8, Lee 4, Lau 3, Tang 1, Xu 0. (ESL)