Duterte pormal miabli miabli sa Palaro

VIGAN CITY, Ilocos Sur - Ang edukasyon sa mga kabataan ug ang pagpalambo sa physical education maoy usa sa mga prayoridad sa administrasyon ni Presidente Rodrigo Roa Duterte.

Kini maoy gipalanog sa Pre­sidente sa iyang hamubong mensahi ngadto sa tanang mga delegasyon nga mitambong sa pag-abli sa Palarong Pambansa 2018.

Gibanabanang moabot ngadto sa kapin 10,000 ka mga tawo ang mitambong sa maong kalihukan.

Ang parada usab sa mga atleta inubanan sa nagkadaiyang delegado sa tanang 17 ka rehiyon sa nasod mao mipatid sa opening ceremony.

Lakip nga mga mitambong mao sila si Palaro Exe­cutive Secretary Salvador Me­dialdea, Department of Edu­cation Secretary Leonor Briones, Bantay, Ilocos Sur, Mayor Samuel Parilla III, Go­vernor Ryan Luis Singson, ug ang amahan niini ug kanhi governor Chavit Singson.

Wala molapas og 10 minutos ang speech ni Duterte diin nakig-groufie ni sa atleta human sa programa.

Ang fireworks maoy pormal nga mitapos sa maong kalihukan samtang karong adlawa sugdan na ang proper competition sa tanang mga events.

Samtang, usa ka staff sa Central Visayas Regional Athletic Association (Cviraa) nga anaa sa Ilocos Sur ang gidala sa tambalanan ug gioperahan human kini makasinati og ka­sakit sa tiyan.

Gatuo si Manolito Mayorga, 33, nga usa lang kadto ka pagsakit sa iyang tiyan apan nibuto na diay ang appendix.

Pipila ka mga adlaw human sila maabot sa billeting quarter sa Ilocos Sur nakawiring pa sa kur­­­­yente sa tunghaan si Mayorga.

Apan Huwebes, Abril 5, dihang nakasinati na kini og pagsakit sa tiyan.

Hinuon, giabaga sa Department of Education ang tanang bayrunon ni Mayorga sa hospital.

Sa niaging adlaw, si Darlene dela Pisa, ang trainer sa gymnastics nahindangat usab sa hospital tungod sa dili maayong gipamati sa lawas apan nakagawas ra usab dayon kini human hingpit nga naalim. (HBL)