2-2 tuyo sa Gins

TABLAHON og suway sa Brgy. Ginebra Gin Kings ang best-of-seven semi-finals series sa ilang pagpakigbatok og balik sa three-time defending champions San Miguel Beermen karong gabii sa Phi­lippine Basketball Association (PBA) Philippine Cup sa Mall of Asia Arena sa Pasay City.

Human sila nasugamak sa su­nodsunod nga kapildihan sa nag-unang duha ka mga du­wa sa series, ang Gin Kings namungot ug ilang gipanghubog ang Beermen, 95-87, sa Game 3 niadtong Martes sa gabii.

Naggukod man tuod giha­pon sila sa series, 2-1, apan dili ikalimod nga taas ang moral sa Gin Kings nga mokombati ning higayuna ug nakakuha sab sila og saktong momentum human sa ilang kadaugan sa Game 3.

Karon nga napamatud-an sa Gin Kings nga kaya nilang lu­pigon ang Beermen bisan wala ang ilang pambatong hi­gante nga si 7-footer Greg Slaughter, hayan gilaumang mas madasigon sila ning higayuna.

Makabalik na kaha og duwa si Slaughter ning kombatiha?

“We’re trying to get him back in, but nothing’s working so far. He’s still got swelling and pain in his foot,” mao kini ang gibutyag ni Ginebra coach Tim Cone human sa Game 3 nga napatik sa Spin.ph.

“I don’t know when Greg is gonna be back.”

Hinuon naa o wala ang produkto sa University of the Visayas (UV) Green Lancers, ang Gin Kings andam gihapon mobangga sa puwersa sa Beermen nga gipangulohan sab og higante gikan sa Sugbo nga si JuneMar Fajardo.

Sa ilang bahin, ang Beermen aduna sa’y kakulian nga kinahanglang sagubangon ning higayuna tungod kay dili siyento porsiyento ang kondisyon sa ilang pambatong pointguard nga si Chris Ross.

Si Ross wala na nakaduwa sa 2nd half sa Game 3 gumikan kag nagsakit ang bagtak niini sa tuo nga tiil.

Apan masaligon si Ross nga makabarog ra og tarong ang Beermen bisan wala siya.

“We’re a champion team. Just cause I’m not there doesn’t mean we’re not a champion team. We got a lot of fighters in our team and I got faith in everybody who coach puts in that’s gonna go out there and compete,” matod ni Ross.

Kon dili makaduwa si Ross o moduwa kini nga dili siyento porsiyento ang kondisyon niini, gipasalig ni Cone nga ilaha gyud kining pangitaan og paagi aron mapahimuslan.

“He’s a huge, huge difference on that team,” batbat ni Cone. “Everybody knows how good he is, his impact, but I still think it’s underrated. He’s a special player. I don’t hope that he’s injured, but if he is, we’ll try to take advantage.”

Nagkanayon si Ross nga kon iyang makaya, moduwa siya a­ron makatabang sa Beermen.

“I’ll be ready. I’m a warrior,” asoy ni Ross.

Game 3 boxscore:

Ginebra (95) - Aguilar 25, Tenorio 18, Caperal 12, Cruz 12, Devance 11, Thompson 9, Mercado 8.

San Miguel (87) - Fajardo 23, Lassiter 14, Santos 13, Cabagnot 13, Ganuelas-Rosser 8, Ross 6, Lanete 5, Heruela 3, Espinas 2. (ESL)