Tabla buakon

BUAKON sa Magnolia Ang Pambansang Manok Hotshots ug NLEX Road Warriors ang ilang panagtabla sa ilang panagharong og balik karong gabii sa Game 3 sa Philippine Basketball Association (PBA) Philippine Cup semi-finals series sa Araneta Coliseum.

Human sa ilang masakit nga kapildihan sa Game 1, 87-88, ang Hotshots namungot sa Game 2 ug ilang gidabudabohan ang Road Warriors, 99-84, aron tablahon ang best-of-seven series.

Alang kang Road Warriors coach Yeng Guiao nga maayong nakatilaw sila og kastigo sa Game 2 gumikan kay makawagtang kini og pressure alang kanila.

“In a way, it’s good because it releases some of the pressure (off us),” matod ni Guiao sa interbyu sa PBA.ph.

Gipasabot ni Guiao nga ang dako nilang kapildihan sa Game 2 dili makapaubos sa ilang moral ug nagtuo siya nga mobalik ra ang kadasig sa iyang mga batos ning higayuna.

“I expect us to be recharged in Game 3,” dugang ni Guiao.

Alang kang Hotshots coach Chito Victolero, wala ra’y tantong bili alang kanila ang dako nilang kadaugan sa Game 2.

“We just tied the series,” matod ni Victolero.

Naangkon sa Hotshots ang kadaugan sa Game 2 bisan migawas og sayo si Marc Pingris gumikan kay naangol kini, wala sab si Justin Melton (hamstring) unya dili 100 percent ang kondisyon ni Mark Barroca.

Nag-agak sa Hotshots sa kadaugan mao ang ilang pambatong pointguard nga si Paul Lee, kinsa nagpakatap og 27 puntos human sa iyang bugnaw nga duwa sa Game 1 diin igo lang siyang nimugna og walo ka mga puntos.

Gawas kang Lee, nilihok sab og maayo si Ian Sangalang aron tapakan ang dakong haw-ang sa puwersa sa Hotshots. Niamot si Sangalang og 18 puntos alang sa ilang kadaugan sa Game 2.

“We adjusted a little bit on our defense and we tried to move the ball,” pasabot ni Victolero.

“We’re looking for some good shots na hindi namin nagawa noong Game 1. Also, we did a good job on defending their guards, especially doon sa mga guards nila na nag-ke-create.”

Gitumbok ni Victolero ang ilang gihimong depensa ngadto sa pambatong pointguards sa Road Warriors nga sila si Kiefer Ravena ug Kevin Alas, nga igo lang nagkumboya og 15 puntos.

Sa pagtuo ni Guiao, molanat og taas kining maong series apan malaumon siya sa ilang poruhan.

Game 2 boxscore

Magnolia (99)-Lee 27, Sangalang 18, Barroca 11, Dela Rosa 10, Ramos 10, Jalalon 9, Simon 8, Reavis 4, Brondial 2

NLEX (84)- Mallari 13, Quiñahan 13, Al-Hussaini 10, Ravena 9, Miranda 8, Alas 6, Fonacier 6, Tiongson 6, Soyud 5, Baguio 4, Taulava 4. (ESL)