Guv's Cup volleyball mopahigayon og All-Star Game

NAGLARAW ang mga nag-organisar sa kasamtangang nagpadayon nga 1st Governor’s Cup Volleyball Tournament nga mopahigayon og All-Star Game.

Ning maong enkuwentro, maghinampakay ang labing maayong mga magduduwa gikan sa North ug South divisions.

“We’re planning to do the All-Star Game, so we can see the top players from North and South play against each other,” matod ni Atty. Ramil Abing, executive director sa Cebu Provincial Sports Commission (CPSC), sa interbyu sa Sun.Star Cebu, igsuong buhatan ning mantalaan.

Ang CCSC maoy nangulo sa pagpasiugda sa kompetisyon.

Matod ni Abing nga gisugdan nila ang pagplano niini niadtong Dominggo atol sa mga duwa nga gipahigayon sa Sta. Fe, Bantayan Island.

“We will still finalize the date and venue, though, for the All-Star Game. But it’s definitely a go,” asoy ni Abing.

Ang hinampakay sa Under-18 female sa torneyo nagsugod sa miaging buwan diin 29 ka teams gikan sa nagkadaiyang local government units (LGU) sa Cebu Province.

Sa North Division mao ang Mandaue City, Cordova, Consolacion, Liloan, San Francisco,Camotes and Poro, Camotes, Danao City, Carmen, Catmon, Sogod, Asturias, Balamban, Santa Fe, Medellin, Bogo City, Tabogon ug Tuburan.

Ang mga sakop sa South division mao ang Talisay City, Minglanilla, Carcar City, Argao, Dalaguete, Oslob, Santander and Samboan,Ginatilan, Moalboal, Algeria and Dumanjug.

Sa laing bahin, gipangpukan sa Liloan ang Consolacion, 22-25, 25-12, 27-25; samtang gipangmakmak sa Mandaue City ang Cordova, 25-4, 25-19, sa laing mga duwa niadtong Dominggo sa Consolacion Municipal Gym. (RSC, ESL)