Tabal mosalmot sa SM2SM Run

GIKOMPIRMAR ni five-time defending SM2SM Run champion Mary Joy Tabal ang iyang partisipasyon sa ikawalong edisyon sa SM2SM Run nga manukad sa SM City sa North Reclamation Area, Cebu City karong Dominggo.

Ang 28-anyos nga Olympian nakadesider nga mo­salmot sa maong lumba human matino nga ang iyang interview sa pag-aplay alang sa Italian visa ipahigayon sa Pebrero 27.

“My interview for my visa will be on Feb. 27 in Manila. I think I can leave for Italy in March. I’m still here for SM2SM Run and I will be joining since it has been a tradition for me,” padayag ni Tabal sa dihang gikahinabo sa SunStar Cebu kagahapon.

Si Tabal maoy midominar sa 21-kilometer race sa SM2SM Run sukad pa niadtong 2013.

Kini maoy ikaduhang pagsalmot ni Tabal karong tuiga human niya patugbabawi ang 7-Eleven Run Philippines sa niaging usa na ka semana.

Ang 29th Southeast Asian (Sea) Games gold medalist Tabal ang bag-o lang mibalik sa iyang training sulod sa usa ka buwan nga pagpahuway human niya malangkat ang 41st Milo Marathon National Finals sa niaging Disyembre nga natukma usab sa kamatayon sa iyang amahan.

“I’m happy that I will be able to join the SM2SM Run before I go back to (international) training,” ingon ni Tabal, kinsa gikatakda nga adto na unya mag-training sa Tuscany Training Camp sa Italy isip preparasyon sa 2018 Asian Games.

Si Tabal mirehistro og 1:23:07 segundos sa iyang pagbalik og dagan sa 7-Eleven Run ug nagtinguha nga mapausbawan pa niya ang iyang oras karong Dominggo. (JBM)