Davis wala kapugngi

MIPAUWAN og 38 puntos si Anthony Davis ug milangkat usab og 10 ka rebounds aron ituboy ang New Or­­leans Pelicans ngadto sa 118-103 nga kadaugan niadtong Lunes sa gabii (Martes sa buntag sa Pilipinas) sa National Basketball Asso­ciation (NBA).

Kini maoy laing impresibong performance ni Davis batok sa Pistons diin nag-average siya og 30.4 puntos nga maoy iyang pinakataas kon itandi batok sa ubang team.

Kon kahinumdoman, sa ni­aging duha ka tuig, si Davis mipaulbo og 59 puntos batok usab sa Pistons.

Gipulipulihan sa Detroit sa pagpadepensa si Davis nila ni Andre Drummond ug Blake Griffin, apan wa gihapon kini makaugpo ilabi na sa ilawom nga bahin ug bisan pa gani sa mga outside shooting niini.

Sa unang higayon, kini ma­oy ikaduhang sunodsunod nga kadaugan sa New Orleans sukad sa pagkawagtang ni DeMarcus Cousins kinsa nakaangkon og seryusong angol sa iyang tikod. Mao usab kini ang ikatulong sagunson nga pildi sa Pistons human sa lima ka nagdugtong nga kadaogan.

Si Griffin mipuga og 22, Drum­mond nakapugnit og 13, gawas sa iyang 21 ka rebounds.

Sa laing bahin, morag bagyo nga gikusokuso ni Stephen Curry ug sa Golden State Warriors ang Phoenix Suns, 129-83, kagahapon sa NBA.

Si Curry mipuga og 22 puntos, 10 niini sa third quarter, aron pangulohan ang Warriors ngadto sa ikatulo nga way putolputol nga kadaugan nga maoy nakapabaliwala sa maayong performance ni Elfrid Payton kinsa mipuga og 29 puntos alang sa Phoenix. Si Payton nga nakuha sa Suns gikan sa Orlando Magic sa niaging semana.

Midugang si Kevin Durant og 17, samtang 16 ang natampo ni Klay Thompson alang sa Warriors kinsa mipukan sa Warriors sa ika-12 nga sunodsunod nga higayon.

Sa ubang mga duwa, gipukan sa Philadelphia Sixers ang New York Knicks, 108-92, Los Angeles Clippers mikuniskunis sa Brooklyn Nets, 114-101, ug gibuntog usab sa Chicago Bulls ang Orlando Magic, 105-101. Gipatapsingan sa Utah Jazz ang San Antonio Spurs. (JBM)