Ancajas-Sultan fight gihikay na

ANAA man tuod sa iyang alimpatakan ang pagpakigsangka sa mandatory challenger nga si Jonas Sultan, apan alang sa kasamtangang International Boxing Federation (IBF) super-flyweight champion Jerwin Ancajas nga hinog na siya nga makigsangka sa mga dagkong pangalan sa 115 lbs.

Buot ipasabot ni Ancajas mao sila si Srisakit Sor Rungvisai sa Thailand, Juan Francisco Estrada sa Mexico ug Carlos Cuadras ug Roman Gonzalez sa Nicaragua.

Ang 29-anyos nga Ancajas lab-as pa sa iyang malampusong ikaupat nga pagdepensa sa titulo pinaagi sa pag-knockout sa Mexican challenger nga si Israel Gonzalez sa ikanapulo nga round didto sa American Bank Center sa Christi Corpus, Texas.

Apan sayod si Ancajas nga aduna pa siyay tahas nga unang sagubangon sa dili pa siya makigsangka sa mga nahisgutan sa unahan.

Kini mao ang pagtuman sa mando sa IBF nga modepensa batok sa mandatory challenger nga si Sultan sa Ala Boxing Club sa Cebu, butang nga gisaad sa iyang boxing promoter nga si Bob Arum sa Top Rank ug posibling adto sa US mapahigayon.

Sa pagkakaron, mopahuway lang una si Ancajas nga magpalabay sa panahon samtang magtan-aw sa mga away sa iyang gusto ikakontra.

Karong Pebrero 24 didto sa Los Angeles, si Rungvisai makigsinukliay sa kumo batok ni Estrada, ug ikasangka usab ni Cuadras si McWilliams Arroyo sa Puerto Rico. (JBM)