Wala pa masayri kanus-a mobalik si Stephen Curry

LABING seguro, dili makaduwa si Golden State War­riors guard Stephen Curry ka­rong adlawa batok sa Charlotte Hornets sa Natio­nal Basketball Association (NBA) gumikan sa angol nga nasinati sa 2-time MVP sa miaging duwa sa Warriors.

Napiko ang tuo nga tiil ni Curry sa ulahing bahin sa ka­daugan sa Warriors batok sa New Orleans Pelicans niadto lang Martes.

Negatibo man tuod ang resulta sa X-ray apan nasuta sa MRI nga nalisa og grabe ang tiil ni Curry ug wala pa’y klaro kon kanus-a kini makabalik og duwa.

“The MRI indicated that the ankle is stable and structurally intact,” opisyal nga pamahayag sa Warriors.

Susihon pagbalik sa Warriors ang sitwasyon ni Curry inig labay sa duha ka mga semana.

Si Curry misuway pag-ilog sa bola gikan kang E’Twaun Moore apan sa wala tuyoa, nasaghiran niya ang tiil ni Moore hinungdan nga natakilpo siya.

“It was a dumb play because I tried to go for a steal,” pasabot ni Curry. “And then, obviously, it was just a bang-bang (play). I got caught on E’Twaun’s shoe as I went by him and couldn’t catch myself.”

Dako nga haw-ang ang kinahanglang tapakan sa Warriors sa pagpadayon sa ilang kampanya sa pagpadaplin ni Curry.

Hinuon aduna sila'y igong puwersa nga makabuhat sa ingon. (AFP, ESL)