Cebu Province dili na lider

NABUHIAN sa Cebu Province ang ilang paggunit sa liderato sa medal tally human nanghawod ang host Du­maguete City sa archery event kagahapon sa ikaupat nga adlaw sa 2017 Batang Pinoy Visayas Qualifying.

Ang Cebu Province nakahakot unta og unom ka gold medals gikan sa ilang karatedo team apan mas ngilngig ang gipang-target sa archery team sa Dumaguete City.

Ang archery team sa Dumaguete City naka-bullseye og 11 ka gold medals aron ilugon ang liderato gikan sa Cebu Province.

Nakatigom na ang Duma­guete City og 27 ka gold medals, 16 ka mga silver ug 19 ka mga bronze aron temporaryong gunitan ang liderato samtang ang Cebu Province adunay 23 ka gold medals, 21 ka mga silver ug 30 mga bronze.

Ang Cebu City naa sa ikatulong luna dala ang 16-31-31 medal haul.

Ang karatekas nga nagtunol og gold medals sa Cebu Province mao sila si Trisha Jean Ogoc (25kgs.), Rheiane Annarie Luza (35kgs.) ug Precious Avegail Belicario (40kgs.) sa girl’s 13-below kumite, Giovani Ephraim Apuya (45kgs.) sa boys’ 13-below kumite, Rome Florence Metante (52kgs) ug Jerson Sanchez (57kgs.) sa boys’ 14-15 kumite event.

Sa kinatibuk-an, ang katatedo team sa Cebu Province nakahakot na og 12 ka gold medals, walo ka mga silver ug pito ka mga bronze.

“We’re very satisfied with our performance. It’s almost 100 percent for us because on our 27 athletes only three or four did not qualify (Batang Pinoy National Championship),” asoy ni Cebu Province karatedo coach Rhodee Antoinette Saavedra sa interbyu sa Sun.Star Cebu, igsuong buhatan ning mantalaan.

Ning puntoha, wala pa'y nakaseguro nga makakuha sa overall title sa kompetisyon nga mahuman karong Nobiyembre 16. (RSC, ESL)