Ginebra-Meralco finals sugdan na

Duwa karon:
(Quezon Convention Center)
7:00 pm. Meralco vs. Ginebra

WA man tuoy titulo nga ma­langkat sa duwa karong gabii, apan ang bintaha sa series maoy anaa karon sa alimpatakan sa matag habig sa dihang sugdan na karong gabii ang best-of-seven finals sa Barangay Ginebra ug Meralco Bolts sa PBA Governors’ Cup sa Quenzon Convention Center.

Kini maoy unang higayon alang sa Sugboanong si Greg Slaughter nga makaduwa sa finals human kini ma-injured sa niaging tuig sa dihang ang Ginebra nakampiyon ning mao gihapon nga conference batok sa susamang team.

Kon ugkiton og maayo ang kaagi, daghang kasaysayan ning maong panag-engkuwentro nga nagpahipi.

Una kining higayona nga si Slaughter makigsangka sa team sa iyang kanhi coach sa Ateneo nga si Norman Black human sa ilang malampuson nga panag-uban sa college diin nakahagdaw sila og duha ka sunodsunod nga titulo.

Lima ka tuig ang milabay, karon anaa na sila sa manag-atbang nga lingkuranan nga mag-ilog sa kampyonato.

“Just goes to show you what a great coach he is,” matod ni Slaughter.

“Everywhere he’s gone, he is having a lot of success. I’ve learned a lot from him and now it will be interesting to go up against him.”

Laing kanhi kauban sa Ateneo nga ikaatbang ni Slaughter mao ang iyang higala nga si Chris Newsome, kinsa maoy higpit niyang ikaribal sa Best Player of the Conference award, apan alang sa duha, ang pagdaog sa titulo maoy ilang prayoridad.

Sentro usab ang presensiya sa beteranong si Ranidel de Ocampo, kinsa bag-o lang nakuha sa Bolts gikan sa kampo sa TNT KaTropa. Kini maoy ikanapulo nga finals appearance ni Ocampo ug ang iyang eksperiyensiya gituohan nga makatabang og dako sa Bolts.

Tinguha ni import Allen Durham sa Bolts nga molampos na siya ug ang Bolts sa paglangkat sa ilang unang titulo, butang nga wa niya mahimo sa niaging tuig.

Si Justin Brownlee sa iyang bahin, nanglantaw usab nga makakulit og kasaysayan sa Ginebra.

Unom na ka import ang nakapa-champion sa Kings apan way bisag usa nga naka-duha ka titulo. Kini maoy siakon ni Brownlee kinsa maoy nakapakampyon sa Gi­nebra sa niaging tuig batok sa Star Hotshots.

Ang Kings-Bolts finals mao usab ang laing panag-atbang sa mga grand slam coach nga sila si Tim Cone ug Black kinsa ka tulo na kahigayon nag-abot sa championship round.

Sa tulo nila ka panagsangka wa pay nadag-an si Black. Kini niadtng 1995 Governors’ Cup, 2014 Commissioner’s Cup ug 2016 Governors’ Cup. (JBM)