1st OBL Prestone Reg'l tournament sugdan ugma

SUGDAN na ugmang adlawa sa ala una ang takna sa hapon ang 1st OBL prestone Regional tournament diha sa Cebu Eastern College gym.

Kini maoy gipahibawo ni Mark Anthony Tallo, kinsa maoy chief organizer sa torneyo nga salmotan sa pipila ka mga eskuwelahan ug mga training camp sa dakbayan sa Sugbo.

Moabot ngadto sa 22 ka mga teams ang magtigi sa torneyo diin ang mga partisipante gibahin ngadto sa tulo ka ka­tegoriya nga mao ang 12-under, 15-under ug 18-under.

Gipasabot ni Tallo nga ang ma-champion sa maong torneyo mo-represent sa national finals karong Disyembre.

Ang CEC ug ang Inayawan Selection maoy magtigi sa opening game nga mosugod sa ala una sa hapon sa 12-under selection diin pagasundan kini sa panagsangka tali sa Salazar Institute of Technology ug CEC sa 18-under division. Samtang sa laing bahin, ang OBL Cagayan de Oro Regional Meet mosugod sa Nobiyembre ubos sa pagdumala sa ilang regional director nga si Rommel Delosa.

Ang OBL Prestone League mopahigayon usab sa ilang pre-season games sa Nobiyembre 11 sa Foundation University. (JBM)