Nabong pabilin nga suspendido

BISAN kuwang sila og haligi sa ilawom sa ilang pagpakigbatok sa Brgy. Ginebra Gin Kings sa finals series sa Philippine Basketball Association (PBA) Gover­nor’s Cup nga sugdan ug­ma, gibutyag sa Meralco Bolts wala gihapon sila’y plano nga libkason ang sus­pensyon nga ilang gipahamtang ngadto kang Kelly Nabong.

Gipasabot ni Meralco coach Norman Black nga wala pa masayri kon kanus-a ilibkas ang suspensyon ni Nabong, kinsa gisilutan sa management gumikan sa pagpakiglalis niini kang assistant coach Jimmy Alapag sa semi-finals diin ilang gipalagpot ang Star Hotshots.

“There is no update. He’s suspended indefinitely,” batbat ni Black nga napatik sa Spin.ph.

“I can’t really go into full detail about what actually happened, because I would like to consider his privacy as well as the privacy of the team.”

Nagkanayon si Black nga kasamtangan silang nagtutok sa ilang kampanya sa finals ug dili pa nila hatagan og atensyon ang kabahin sa isyu sa 6’5” nga si Nabong.

Magamit unta sa Bolts ang gitas-on ug gidak-on ni Nabong aron makataban pagdepensa bisan asa nila ni 6-11 Greg Slaughter, 6-9 Japeth Aguilar, 6-7 Joe Devance ug 6-5 Justin Brownlee apan mas importante alang kanila nga mopatigbabaw ang desiplina sa ilang tanan nga mga magduduwa. (ESL)