Milendo gusto'g unification fight

KON siya lang ang matuman, gusto ni International Boxing Federation (IBF) jr. flyweight champion Milan Melindo nga ikaharong ang bisan kinsa nga world champion sa iyang tim­bang sa usa ka unification bout alang sa sunod niyang tahas.

“Gusto ko moaway sa ubang world champions sa akong division,” matod ni Melindo sa miaging gabii sa The Park Social sa IT Park atol sa kasaulogan sa iyang malampusong pagdepensa sa titulo sa Pinoy Pride 42 sa miaging semana sa Waterfront Hotel.

Hinuon matod ni Melindo nga mag-agad ra gihapon siya sa desisyon sa iyang promoter nga mao ang ALA Promotions.

Ang laing world champions sa weight division ni Melindo mao sila si Ken Shiro sa WBC, Ryoichi Tagachi sa WBA ug Koesei Tanaka sa World Bo­xing Organization (WBO) nga pulos mga Hapon.

Nadepensaan ni Melindo ang iyang titulo pinaagi sa impresibong split decision nga kadaugan batok kang South African Hekke Budler.

Ang kampo ni Budler mita­gaw­taw sa social media nga na­biktima sila sa surambaw nga desisyon apan wala ra kini ha­tagi og gibug-aton ni Melindo.

“Kon gusto nila, mag-away mi’g balik basta sila na sab ang mo-promote. Ready ko moaway bisan adto pa sa South Africa,” batbat ni Melindo.

Ang stablemate ni Melindo nga si Jonas “Zorro” Sultan, kinsa impresibong mipukan ni kanhi world champion Johnriel Casimero sa eliminator bout, mi­adayag nga gusto niyang sang­kaon alang sa sunod niyang away si WBO jr. bantamweight king Naoya Inoue sa Japan alang sa sunod niyang away.

“Pero naa ra gyud na nila si Sir Ala,” matod ni Sultan.

Si Sultan mao karon ang mandatory challenger sa laing Pinoy nga si IBF jr. bantamweight champion Jerwin Ancajas human niya surprisang gipildi si Casimero niadtong Sabado sa supporting bout sa away ni Melindo ug Buddler. (ESL)