Jomang's batok Aspa Formworks sa Balamban

PANIMALOS maoy anaa ka­ron sa alimpatakan sa Aspa Formworks and Scaffoldings sa dihang ilang ikasangka og balik karong gabii ang Jomang’s Surplus sa usa ka exhibition basketball nga ipahigayon sa Mayor Exasperanza Binghay Memorial Sports Complex sa lungsod sa Balamban.

Ang Aspa nga gipanag-iya ni Arnold Quilaton bidahan sa kanhi star player sa University of San Carlos nga si Enrico Llanto ug Michael Moneva, kanhi UV pointguard Frangel Omolon ug power forward nga si Obado.

Sa 2017 Cebu City Mayor’s Cup basketball tournament, ang Jomang’s nga nagdala sa ngalan nga Vescon mipukan sa Aspa Scaffoldings, 94-85, sa championship game nga gipahigayon sa Cebu City Sports Institute gym.

Samtang ang Aspa mosulod usab sa korte karong gabii nga taas ang moral sanglit sila man usab ang nakampyon sa bag-ong natapos nga 2017 Barili Mayor’s Cup.

Ning bag-ohay lang nisalmot usab sila sa Emil’s Fresh Chicken Cup sa Minglanilla ug sa kasamtangan misalmot usab sila sa Aloguinsan Ma­yor’s Cup tournament.

Kining maong exhibition match maoy usa sa mga kalihukan sa kapistahan sa lungsod sa Balamban. (JBM)