Panimalos tinguha sa Panthers

NAKABATON og taas nga moral sa miagi nilang duwa, ang University of Southern Philippines Foundation (USPF) Panthers mosuway pagbawos sa University of Cebu (UC) Webmasters sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.

Ang Panthers gikan sa impresibong kadaugan batok sa usa sa mga gikahadlukan sa liga nga mao ang University of San Carlos (USC) Warriors, 88-81, niadto lang Martes.

Nahimo kini sa Panthers bisan wala ang ilang import nga si Rich Managor, kinsa adunay angol.

Dili ikalimod nga ang ka­daugan sa Panthers ni coach Albert Alocillo batok sa Warriors nakahatag kanila og dugang kadasig sa tinguha niining makakumpayot og luna sa nagkaduol nga semi-finals.

Sa kasamtangan, ang Panthers naa sa ikalimang dapit dala ang 3-5 nga baraha samtang ang Webmasters naa sa ikaupat nga adunay 4-4 nga rekord.

Ang mopatigbabaw lang nga upat human sa double-round robin elimination mao ang makaabante sa sunod round samtang manamilit ang mahabilin nga tulo.

Sa premiro nilang panagsangka, gipangpukan sa Webmasters ni coach Raul “Ya­yoy” Alcoseba ang Panthers, 107-95, niadtong Agusto 26.

Apan wala kini nagpasabot nga makonsiderar nga inilog ang Webmasters ning kombatiha hilabi na kay gikan sila sa duha ka sunodsunod nga kapildihan batok sa Southwestern University (SWU)-Phinma Cobras, 62-71, ug defending champion University of the Visayas (UV) Green Lancers, 62-65.

Gawas pa sab, ang Panthers nakapukan na sab sa Webmasters dihang nag-abot sila sa usa ka dakong torneyo sa Bayugan City sa wala pa nagsugod ang liga.

Ang Panthers mosandig og maayo sa abilidad nila ni Lugie Cuyos, Lyndon Colina, Rodelio Cauba, Edwin Villarta ug Kenneth Cada.

Samtang ang Webmasters mosalig nila ni Peter Paul Codilla, Micahel Gonzaga, John Calvin Jabello, Garciano Puerto ug import Frederick Elombi.

Sa premirong duwa, magsangka ang University of the Visayas (UV) Baby Green Lancers ug Cebu Eastern College (CEC) Dragons sa high school division.

Ang wala’y pildeng Baby Green Lancers nagtinguha sa ikawalo nilang sunodsunod nga kadaugan samtang ang Dragons adunay 3-3 nga rekord.

Bisan asa nga departamento, tatawng nakabintaha ang Baby Green Lancers ning sangkaa apan kon molugak sila bisan gamay, delikadong mabugwakakan sila og magkayo nga opensa sa Dragons. (ESL)