Fil-German kuhaon sa Kia isip No.1 pick

NAGHINAMHINAM si Kia Picanto deputy coach Chris Ga­vina sa umaabot nga rookie draft sa Philippine Basketball Association (PBA) gumikan kay alang ka­niya, naa sa grupo sa umaabot nga bag-ong mga magduduwa sa liga ang ilang gikinahanglan.

Sa nagpadayong Governor’s Cup conference, ang Picanto wala pa’y daog sulod sa siyam ka mga magduduwa apan wala na kini nila panumbalinga, ang gihatagan nila’g dakong atensyon ang sunod nga lakang nilang pagabuhaton.

Wala pa’y official order sa rookie draft sa sunod buwan apan basi sa kampanya sa tanang teams gikan sa pagsugod sa season, ang Picanto adunay dakong poruhan nga makapanag-iya sa katungod sa No.1 overall pick.

Karibal sa Picanto sa inilugay sa No.1 pick mao ang NLEX Road Warriors ug Blackwater Elite.

Gipasabot ni Gavina nga wala siya’y ideya kon unsa’y plano sa management sa umaabot apan kon magpabilin siyang deputy coach sa team unya makuha nila ang katungod sa No.1 overall pic, gipaneguro niya nga iyang kuhaon si Fil-German Christian Standhardinger.

“If we can get a guy like Standhardinger, with his experience, demeanor on the court, skill set, he can easily turn this franchise around if you can get him,” matod ni Gavina sa interbyu sa Spin.ph. (ESL)