7'1" nga higante andam na'ng mokayod alang sa Gilas

SA iyang paghiabot sa nasod sa miaging gabii, mideklarar dayon ang 7’1” nga higante Isaiah Austin nga andam na siyang motrabaho alang sa umaabot nga kampanya sa Gilas Pilipinas.

“I’m here. Ready to get to work,” tweet ni Austin nga adunay enoji sa bandera sa Pilipinas.

Si Austin, kinsa lig-ong kandidato aron mahimong naturalized player sa nasod, usa sa mga import sa Gilas alang sa FIBA Asia Championship nga ipahigayon karong Septiyembre 22-30 sa China.

Gawas kang Austin, ang laing import sa Gilas mao si Bright Akhuetie, kinsa nakaapil na sa praktis sa team sa miaging adlaw.

“Thank you to all the fans for the endless love and support that I’ve received already,” dugang tweet ni Austin.

Lakip sa lokal nga mga magduduwa sa Gilas Pilipinas, nga suportado sa Chooks-To-Go sa kampanya niini sa China, mao sila si Jeron Teng, Carl Cruz, Raymar Jose, Achie Iñigo, Jett Manuel, ug ang bag-ong butho nga si Andre Paras, igsuon ni Kobe Paras. (ESL)