Gilas nakakuha'g higante

NAKAKITA na ang Gilas Pilipinas og ihulip kang Andray Blatche isip naturalized player.

Gitumbok mao si Isaiah Austin, kinsa kanhi nasiplatan nga adunay dakong poten­syal nga makaduwa sa National Basketball Association.

Si Austin nalantawan nga mahimong first round pick niadtong 2014 NBA Rookie Draft apan nasuta nga aduna kini Marfan Syndrome, usa ka klase sa sakit sa kasingkasing.

Gumikan niini naahat ang 7’1” nga higante sa pag-undang og duwa.

Sa miaging tuig lang nakabalik og duwa si Austin human kini nakakuha og pagtugot gikan sa mga doktor.

Si Austin, kinsa nakatakdang moabot sa nasod karong adlawa, mosugod og duwa sa Gilas Pilipinas sa Fiba Asia Champions Cup nga ipahigayon sa sunod semana sa China.

“We wanted to take a look at Isaiah Austin, not only his skills, his game, but how he’ll get along with his teammates,” asoy ni national coach Chot Reyes sa interbyu sa Spin.ph.

“We want to take a look if he would be a good prospect for a naturalized player for us.”

Gipasabot ni Reyes nga bisan nagduwa pa lang sa kolehiyo si Austin, ilaha na kining giplanuhan nga kuhaon aron makatabang sa kampanya sa Philippine basketball sa nagkadaiyang international events.

Gihulagway ni Reyes si Austin nga haom sa ilang gipangita nga magduduwa, taas nga adunay tira sa gawas.

Naghinamhinam si Reyes sa kampanya sa Gilas sa paghiabot ni Austin. (ESL)