Watanabe gold ang tinguha sa SEAG

WALA'Y lain kon dili gold me­dal maoy tinguha ni Fili­pino-Japanese judoka Kiyo­mi Watanabe sa 2017 South­east Asian Games nga ipahigayon karong Agusto 19-30 sa Kuala Lumpur, Malaysia.

Mao kini ang gipadayag ni Watanabe kagahapon sa iyang pagpakighinabi sa Cebu local sports media sa Kan-anan Restaurant sa Robinsons Galleria Cebu.

“Three months ang iyang preparation for the SEA Games. Iya gyud na kanunay isulti nga ‘I will do my best.’ Confident siya nga maka-gold sa tournament,” matod sa bisaya nga i­nahan ni Watanabe nga si Irene Sarausad Watanabe.

Si Watanabe nakahatag na og duha ka gold medals sa Pilipinas sa SEA Games niadtong 2013 ug 2015. Nakakuha sab siya og bronze medal sa kompetisyon niadtong 2011.

Nakabira na sab og silver medal si Watanabe sa European Open Women’s Championship sa Austria ug bronze medal sa International Judo Federation World Tour sa Paris ning tuiga.

Si Philippine Judo Federation (PFJ) president Dave Carter nagkanayon nga si Watanabe mao ang labing taas og world ranking gikan sa mga nasod sa Southeast Asia. Kasamtangan siyang nagpatong sa ika-27 sa world ranking.

“Nobody in Southeast Asia has ranked that far,” matod ni Carter.

Human sa SEAG, daghan pang mga torneyo ang salmutan ni Watanabe alang sa iyang tinguha nga makakuha og luna alang sa 2020 Tokyo Olympics.

Kinahanglan kining buhaton ni Watanabe aron makahakot og puntos nga maka­hatod kaniya sa Tokyo Games.

Nagkanayon si Philippine Sports Commission (PSC) Commissioner Ramon Fernandez nga ang ilang buhatan, sama sa naandan, andam mohatag og kinatibuk-ang suporta alang kang Watanabe.

“Wherever she wants to go in the world to compete, we will support her. We’ll send her around the world not only SEA Games but also for the Asian Games and the Olympics,” asoy ni Fernandez, kinsa kanhi 4-time PBA MVP. (ESL)