UC Webmasters vs. UV Lancers

Mga duwa karon
1:00 pm- USJR vs. USC (jrs)
2:30 pm- UC vs. SWU (jrs)
4:00 pm- UV vs. UC (srs)
5:13 pm- USC vs. USPF (srs)

PUNTERYAHON sa University of the Visayas (UV) Green Lancers ang ikatulo nilang sunodsunod nga kadaugan sa ilang pagpakigbatok sa University of Cebu (UC) Webmasters sa ikatulong duwa karong hapon sa Cebu Schools Athletic Foundation Inc. (CESAFI) college division sa Cebu Coliseum.

Sa nag-una nilang duha ka mga tahas, ang Green Lan­cers ni coach Gary Cortes nakaposte og managlahing klase sa kadaugan.

Yano nilang gipanglam­pornas ang Cebu Institute of Technology University (CITU) Wildcats, 69-48, sa premiro nilang tahas samtang ning-agi sila og pagpanghudlat una nila nabuntog ang University of San Jose Recoletos (USJR) Jaguars, 77-70, sa ikaduha nilang duwa.

Batok sa Webmasters ni coach Atty. Ken Sesante, ang Green Lancers makonsiderar nga inilog gihapong modaog.

Apan usa ka gamay nilang paglugak mahimong mahimong pahimuslan sa Webmasters aron pagposte’g surpresang kadaugan.

Ang Webmasters adunay 1-1 nga rekord. Nasubhan sila og 75-81 nga kapildihan batok sa Jaguars, 75-81, apan mingbawi sa ikaduha nilang duwa ug namungot sa University of Southern Philippines Foundation (USPF) Panthers, 103-92.

Ang Green Lancers magsalig og maayo nila ni Rey Suerte, Tristan Albina, Jerome Napao, Alfred Codilla, Josue Segumpan ug import Bassieru Sackor.

Moparang sa mga nangahisgutan mao ang mga pambato sa Webmasters nga sila si Garciano Puerto, Joven Tagudin, John Calvin Jabello, Filvenson Culango, Justine Dacalos ug Gileant Delator.

Sa main game, magsangka ang defending champions University of San Carlos (USC) Warriors batok Panthers, nga parehong nasubhan og ka­pildihan.

Sa mga kombati sa high school division, magkombati ang Baby Jaguars batok Baby Warriors sa premirong duwa samtang magharong ang Baby Webmasters batok Southwestern University (SWU) Baby Cobras. (ESL)