Mga bukya wa kapugong sa giila nga Aquaman sa nasod

BISAN nakasugat siya og ta­pok sa mga bukya, naka­maneho gihapon ang gi­ta­wag og Pinoy Aquaman nga si Atty. Ingemar Macarine pagtiwas og langoy sa kadagatan gikan sa Argao, Cebu paingon sa Brgy. Pantudlan, Cabilao Island, Loon, Bohol niadtong Dominggo.

Ang lumad nga taga Tubigon, Bohol mihuman og langoy sa distansya nga 18.15 kilometers sulod sa walo ka mga oras ug 25 ka mga segundos.

Kini maoy ika-33 nga pag­langoy ni Macarine sa kadagatan sa nagkadaiyang mga dapit ug ikatulo niyang paglangoy sa kadagatan sa Sugbo.

“I was thinking of abandoning the swim when I encountered a swarm of nasty jellyfish the first 7K,” asoy ni Macarine sa Sun.Star Cebu, igsuong buhatan ning mantalaan.

Ang adbokasya ni Macarine mao ang pag-promote sa limpyong kadagatan.

Sa sunod buwan, mosuway paglangoy si Macarine sa English Channel sa Europe nga wala niya nahimo sa premiro niyang pagsuway gumikan sa ngil-ad nga panahon. M(RSC, ESL)