Lakers mipukan sa Mavericks; sud sa finals sa NBA Summer League

NAKATAAK sa finals ang Los Angeles Lakers human sa ilang 108-98 nga kadaugan batok sa Dallas Mavericks kagahapon sa National Basketball Association (NBA) Summer League semi-finals sa Las Vegas, USA.

Ang impresibong rookie sa Lakers nga si Lonzo Ball paingon na sab untang momugna sa iyang ikatulong triple-double apan wala kini nakatiwas sa duwa gumikan kay naangol ang bagtak niini.

Bisan nalimitahan lang siya og 21 ka mga minutos sulod sa korte, si Ball nakatampo gihapon og 16 puntos ug 10 rebounds.

Amh Lakers gipangulohan ni Kyle Kuzma pinaagi sa iyang 24 puntos, nidugang og 20 puntos si Matt Thomas samtang niamot og 17 puntos si Vander Blue.

Si Ball mitali og 5-of-7 shooting sa wala pa niya nasinati ang iyang angol. Niadtong higayuna, aduna na’y upat ka rebounds si Ball alang unta sa ikatulo niyang tirple-double.

Gidagan-dagan ni Ball ang iyang tiil sa 3rd quarter sa pamasin nga mawala ra ang sakit sa iyang bagtak apan wala kini nahitabo. Nagkanayon si Lakers summer league coach Jud Buechler nga wala pa’y tino kon makaduwa si Ball sa finals.

“His health comes first,” pa­sabot ni Buechler. “We’ll see how he feels in the morning.”

Sa finals, ikaharong sa Lakers ang Portland Trail Blazers nga ningpukan sa Memphis Grizzlies, 87-82, sa laing semis nga kombati.

Si Jarnell Stokes nimugna og 22 puntos ug 15 rebounds aron pangulohan ang Trail Blazers. (AP, ESL)