Tapales overweight?

Edri K. Aznar

BISAN pa man sa subsob nga ensayo, overweight gihapon si World Boxing Organization (WBO) Marlon Tapales og duha ka libras, usa ka adlaw sa dili pa ang official weigh-in sa iyang unang pagdepensa.

Masaligon si Tapales nga makuha ra gyud niya ang ensaktong gibug-aton sa tinimbangay nga gikatakda karong adlawa.

“Gamay ra ni. Duha ra ka pounds,” matod sa 25 anyos nga Tapales sa dihang gikahinabi sa Sun.Star Cebu kagahapon.

Ingon niya nga dili kini problema ug motakdo na siya sa iyang fighting weight.

Si Tapales modepensa sa iiyang titulo batok sa Hapon nga si Shohei Omori sa ilang rematch didto sa Edion Arena sa Osaka, Japan ugma sa gabii.

Sa niaging semana, nahimo nang isyu ni Tapales ang sob­ra sa iyang timbang sa 118-pound limit. Apan iyang gipasabot nga dili kini bag-o alang kaniya kay mao kini iyang naandan.

Iyang gipadayag ang iyang kaandam alang sa maong away. Ingon niya nga dili kini makaapektar sa iyang kondisyon ug dali ra kaayo niyang makuha ang 118 lbs. pinaagi sa jogging karong buntag.

Kon kahinumdoman, si Tapales mi knockdown ni Omori og katulo sa first round. Nakabangon man tuod ang 24-anyos nga haponanon apan nagbarag-barag pa kini. Sa second round, wa usiki ang panahon ni Tapales ug padayon kini nga miataki ni Omori hangtod nga giundang sa re­feree ang away.

Sukad sa ilang panagsangka, kausa pa makaaway si Tapales ug kini mao ang iyang ika-11 nga round nga kadaugan batok ni Pungluang Sor Singyu aron angkon ang WBO bantamweight title.

Sa iyang bahin, si Omori katulo na makaaway ug katulo na usab modaog lakip niini ang pag knockout ni kanhi world title challenger Rocky Fuentes. Si Tapales adunay 29-2, 12 ka knockouts nga record samtang si Omori naghambin og 18-1, 13 ka knockouts nga baraha.