GSW, Rockets, Wizards 2-0 NA

SA gihapon, wa mahimong pro­blema sa Golden State War­riors ang pagpalta sa ilang leading scorer nga si Kevin Durant sa dihang way ka­luoy nilang gilampornas ang Portland Trail Blazers, 110-81, sa Game 2 sa first-round playoffs kagahapon.

Balansing opensa ang gipakita sa Warriors nga gipangulohan ni Stephen Curry nga may 19 puntos, JaVale McGee nga nakatampo usab og 15 puntos aron pag-inat sa ilang bintaha sa serya, 2-0.

Si McGee, ang backup nga big man sa Warriors, perpekto sa iyang pito ka mga field-goal ug gipakita ang iyang mga paboritong alley-oops dunk samtang nagtan-aw si Durant kinsa wala makaduwa tungod sa angol sa iyang bagtak nga iyang nasinati niadtong Dominggo.

Si Draymond Green maayo usab kaayong nakaduwa ug bisan tuod og sais puntos lang ang iyang puntos, nakalangkat kini og 12 ka rebounds, 10 ka assists ug tulo ka blocked shots.

Ang kauga sa opensa nila ni CJ McCollum ug Damian Lillard maoy nahimong dakong haw-ang sa Trail Blazers kinsa nabiyaan na karon sa series, 0-2.

Sa laing duwa, mipakatap og 35 puntos si James Harden ug ang Houston Rockets mibaliwala lang sa 51 puntos ni Russel Westbrook nga maoy pinakataas nga puntos sa triple-double sa kasaysayan sa playoffs, pinaagi sa pagpukan sa Oklahoma City Thunder, 115-111, aron usab sakmiton ang 2-0 nga bintaha sa laing playoffs sa Western Conference.

Ang Oklahoma City mao na usab ang mo-host sa Game 4 ugmang adlawa.

Nagtabla ang score sa wa pa mopabuto og 10 ka sunodsunod nga puntos ang Houston inubanan sa mga tres ni Harden, Patrick Beverley ug Erick Gordon.

Giusban usab sa Washing­ton Wizards ang Atlanta Hawks, 109-101, sa Game 2 sa ilang kaugalingong playoffs sa Eastern Conference.

Si Bradley Beal maoy nanginit sa fourth quarter diin mipuga kini og 16 puntos. Sa kinatibuk-an siya mihagdaw og 31 puntos, lakip ang uwahi niyang tres.

Mitali og 32 puntos si John Wall kinsa napuno sa abiba sa iyang mga dumadapig nga nagpanyagit og MVP.

Motapon ang series ngadto sa teritoryo sa Atlanta karong Sabado (Dominggo sa Pilipinas).

Si Paul Millsap nangulo sa Hawks nga may 27 puntos ug 10 ka rebounds, samtang si Dennis Schroder mihipos og 23 puntos. JBM, AP