3 ka dump trucks nga hugaw nakuha sa Tumalog falls

MIABOT og tulo ka dump trucks ang nahipos nga mga basura sa mga opisyal ug volunteers sa unang adlaw sa pagpanglimpyo sa Tumalog Falls, lungsod sa Oslob sa habagatang Sugbo kagahapon.

Si Oslob Mayor Jose Tumulak Jr. nibutyag nga apil sa nahipos nga mga basura ang mga binotilya nga tubig, plastik sa pagkaon sama sa mga chichirya ug may laya nga mga dahon, sagbot ug nangalata nga kawayan.

Nagsugod sila og limpyo wala pay alas 8 sa buntag nga gisalmotan sa 20 ka mga sakop sa Regional Mobile Force Battalion kanhi Regional Public Safety Battalion nga nagbase sa lungsod sa Sibonga, mga opisyal sa Barangay Tumalog, 30 ka mga habalhabal drayber ug ubang molupyo.

Si Tumulak namahayag nga pinaagi sa pagtinabangay og limpyo mabati usab sa mga habalhabal drayber nga angay sila moapil og pamuyag sa mga tawo nga magpasagad og labay sa ilang mga basura.

Matod niya, dunay nadestino nga mga tawo sa Tumalog Falls, apan tungod sa kadaghan sa mga tawo sa miaging Semana Santa, wa maato og limpyo.

“At least karon, aware na sila nga apil diay sila nga motan-aw ug mobadlong sa mga maghugawhugaw kay maapektuhan baya ang atong panginabuhi dinhi pirme man ni siya sirhan kay atong limpyohan,” padayag ni Tumulak dihang nahinabi sa Superbalita Cebu kagahapon.

Siya nidugang nga mag-agad sila sa rekomendasyon sa Provincial Tourism Office kon limitahan ba usab ang pagpagamit sa Tumalog Falls sama sa sandbar ug dive sites sa Sumilon Island.

Ang lungsod unang nipahibawo nga limitahan hangtod sa 500 ka mga bisita ang pagamiton ug pakaliguon sa sandbar ug dive sites sa isla sa Sumilon kay 522 ang kapasidad niini.

Gawas sa gidaghanon, hangtod sa tulo ka oras na usab ang pagpangaligo ug kinahanglan dunay kaugalingon nga black bags ang mga boat operator.

Himuon na usab nga regular ang pagpanglimpyo sa lungsod sa sandbar ug dive sites sa matag ikatulong Miyerkules sa buwan sugod karong Mayo.

Si Tumulak niingon nga dili niya iapil sa tempoparyo nga pagpasira o pagpahunong sa operasyon ang ang whale shark watching sa Barangay Tan-awan kay mismo ang boatmen o mga sakop sa Tan-awan Oslob Sea Warden and Fishermen Association (TOSWFA) nga nanginabuhi sa dapit, ang nangunay og limpyo sa lugar.

Suma pa niini nga katunga sa adlaw ra ang watching sa mga whale shark o tuki hinungdan makalugar ra ang mga boatmen sa paglimpyo kon makabiya na ang katapusang mga bisita.

Ang mayor nisaysay nga dihang nagsugod sila og limpyo sa sandbar ug dive sites sa Sumilon Island niadtong Abril 10, ang mga boatmen pagka sunod adlaw, nanglimpyo sab og sa mga dapit nga sakop sa whale shark watching.

“Wala na ta mosugo nila nga manglimpyo. Nihimo sila sa ilang own initiative. Mas maayo ang ilang gibuhat kay wala na sila magpaabot og order from munisipyo nga manglimpyo,” dugang ni Tumulak. (SCG)