Sumilon sandbar ablihan, Tumalog Falls sirad-an og 3 ka adlaw: Mayor

HUMAN sa sandbar ug dive sites sa Sumilon Island, ang Tumalog Falls na usab ang sunod nga temporaryong ipasira ni Oslob Mayor Jose Tumulak Jr. sud sa tulo ka adlaw sugod ugma, aron maoy sunod limpyohan.

Ugma ablihan na og balik ang sandbar ug dive sites sa Sumilon Island nga gidumala sa lungsod, human malim­pyohi.

Matod sa mayor, tulo ka adlaw lang ang iyang temporaryo nga pagpasira sa Tumalog Falls nga nahimutang sa barangay Tumalog ug Luka kay di dako ang limpyohan nga lugar gikan sa entrada hangtod sa waterfalls.

“Lisod naman kaayo mo­ingon ta og usa lang ka adlaw unya pun-an na pud og laing adlaw, mahinayak ang mga turista nga moadto, unya wa diay operation didto so, ato na lang gyud gi three days,” suma sa mayor sa pakig­hinabi sa Superbalita Cebu kagahapon.

Sa ilang tigom sa stakeholders sa turismo, ilang nasabutan nga limpyohan ug dili modawat og mga bisita sa sandbar ug dive sites sa matag ikatulong Miyerkules sa matag buwan.

Gibanabanang 3,000 ka kilos sa mga basura ang nahipos sa tulo ka adlaw nga pagpang­limpyo sa sandbar ug kasikbit nga mga dapit sa Sumilon Island sugod niadtong Abril 10 hangtod sa Huwebes sa mia­ging semana. (SCG)