Resorts sa Camotes limpiyo: Magpale

BISAN sa gikataho nga kahugaw sa pipila ka mga tourist destination sama sa Boracay ug Sumilon island, wala pa makita ni Bise Gob. Agnes Magpale ang panginahanglan nga mohimo og clean-up drive sa isla sa Camotes.

Apan hugot niyang gipahimangnoan ang mga opisyal ug molupyo sa dapit nga dili na paabuton nga moabot sa panahon nga kinahanglan na usab sila nga pwersahon sa pagpalimpyo sa kadagatan nga naglibot sa maong isla.

Matod sa bise gobernador nga atol unya sa pagahimuon nga Suroy-Suroy activity sa Camotes sa Abril 21 ug 22, iyang tigumon ang mga ma­yor ug uban pang stakeholder aron tukion ang mga paagi pagsiguro nga dili maabusohan ang kalikupan, ilabi na ang kadagatan sa ilang dapit.

Gipadayag ni Magpale nga bisan og usa ka sikat nga destinasyon ang Camotes, dili kini susama kadaghan og turista kon itandi sa Moalboal.

Human ang temporaryong pagsira ug ang cleanup drive nga gihimo sa Sumilon island, giaghat ni Magpale nga mosunod ang Moalboal tungod sa hilabahin kadaghan nga turista nga anaa sa dapit.

Gusto sab sa opisyal nga masuta ang carrying capacity sa tanang tourist destinationz sa tinguha nga subay ang human traffic sa dapit. (AZDL)