BFP 7 mihangyo sa water districts og fire hydrants

NIHANGYO ang Bureau of Fire Protection (BFP) sa Central Visayas sa mga water district nga magbutang og mga fire hydrant sa mga siyudad ug kalungsoran nga sakop sa franchise a­reas niini ilabi na ning panahon sa ting-init.

Si BFP 7 Director Sa­muel Tadeo niingon nga ma­hinung­danon nga mabuta­ngan og fire hydrants ang mga dapit diin daghan og kabalayan nga delikado kon dunay moulbo nga sunog.

Matod niya, ang desinyo dapat sa matag 300 metros nga gilay-on, adunay hydrant nga ipahimutang.

Iyang gihimo nga sanglitanan ang nahitabo nga dakong sunog sa Barangay Pasil diin minos lang ang kasikbit nga mga fire hydrant.

“Kung malagyan mo ang ba­­wat kanto mas maganda ‘yun, mas maganda ang dulo-­dulo ng bawat kanto,” pamulong ni Tadeo sa pakighinabi sa Superbalita Cebu.

Si Tadeo namahayag nga mas maayo dug-ol ang nahi­mutangan sa mga water hydrant aron dili layo ang kuha­an og tubig sa mga bom­bero nga morespondi og mga sunog kon mahutdan na og tubig diin mausik ang oras kon lagyo ang nahimutangan.

Kon way fire hydrants, mahimo sila mokuha og tubig sa mga swimming pool.

Apan dili sila mahimo mo­kuha og tubig sa mga sapa o dagat.

“Hindi pwede sumipsip sa mga marurumi kasi babara sa host namin,” pasabot ni Tadeo.

Dinhi sa siyudad sa Sugbo, dul-an sa 300 ka fire hydrants ang nag-function.

Base sa database sa BFP 7 niadtong 2015, adunay 317 ka fire hydrants sa siyudad sa Sugbo.

Apan 291 lang ang nag-function, 13 ang depektuso, walo ang giabandonar ug lima ang wala na matultoli. (SCG)