Usa sa 6 nga ‘mikulata’ sa bayot mitahan sa kapitan

NITAHAN na ang usa sa unom ka mga batan-on nga lalake nga giingong ningkulata sa usa ka bayot niadtong Martes sa kaadlawon sa Upper Genes, Barangay Quiot sa syudad sa Sugbo nga miresulta sa dakong kadaot nga nahiagoman sa biktima.

Sa buhatan ni Barangay Kapitan Francis Espares sa Quiot, Siyudad sa Sugbo unang nitahan si Clifford Gimenez, 18, kinsa giubanan sa iyang inahan nga nagpuyo ra usab sa maong dapit.

Ania ang video gikan sa Superbalita Cebu Facebook page:

Si Clifford, grade 9 student, nagmahay sa iyang nahimo kang Noel Radaza nga naa pa karon sa publikong tambalanan human makaangkon og kadaot sa nawong.

Matod ni Clifford nga niadtong mga higayona nga nag-inom sila sa iyang mga barkada nga iya lang nailhan sa ngalan nga Jessie, Brix, Paulo, Jomar ug Brylle.

Pagka alas 4:30 sa kaadlawon nangabot ang lima ka mga bayot ug dayong tupad sa usa sa iyang amigo ug daw sa lain na sa iyang panan-aw ang gihimo sa mga bayot.

Iyang gibadlong nga mamahawa na lang sa ilang giimnan, apan usa sa mga bayot ang giingong nagyawyaw ug gisultian pa kini nga bati og nawong.

Tungod sa kalagot ni Clifford, iyang gipunit ang botelya nga naa sa ilang atubangan ug dayong bundak sa simento.

Apan usa sa mga bayot, matod niya, kalit lang nihamag niya.

Gani naigo ang iyang na­wong lakip na ang ginganlan nga Jomar.

Dinhi na nagsugod ang lamok-lamok nga iyang gitumbok silang Jessie, Brix ug Jomar ang nagkulata kang Radaza.

Ang mga kaubang bayot ni Radaza dali nga nanagan atol sa lamok-lamok.

Nidagan usab si Radaza pa­ingon sa ubos apan gigukod ni Jomar.

Mao na lang iyang nakita nga gitukmod na ni Jomar si Radaza nga maoy hinungdan nga naigo ang nawong niini sa paril nga miresulta sa grabeng kadaot sa nawong.

“Pagdagan akong gikoptan ang usa nya kalit lang ug hamag silang Jessie Brix ug Paulo mao to gisukmag napud siya ni Jomar, akong gibuhian mao to gigukod ni Jomar ug dayon gitukmod padung sa paril mao tong naguba ang nawong,” matod ni Clifford.

Iyang giinsister nga ka usa ra siya nakasukmag kang Radaza ug ang iyang gipakasala ang lima niya ka mga kauban.

Apan bisan pa man niini na­ngayo siya og pasaylo sa kabanay sa biktima ug kang Radaza mismo nga dili siya mapasaka­an og kaso sanglit nagtungha pa siya sa high school. (AYB)