Pulis nga gitipi ‘high value target’: hepe

GIINGONG nalakip sa high value target sa lalawigan sa Sugbo ang napatay nga pulis nga si P02 Romeo Santiago Bolaño.

Mao kini ang hinungdan nga nalabay ang maong pulis gawas sa Sugbo.

Samtang ang kauban niini nga si SPO2 Maricor Aliganga girelibohan na sa katungdanan sa Naga Police station ug anaa gidestino sa Holding Unit sa Cebu Provincial Police Office alang sa imbestigasyon.

Sila si Bolaño ug Aliganga ang nagkuyog dihang gipusil patay ang nahauna niadtong Martes sa hapon.

Si Bolaño, 49, gipusil patay samtang nag-park sa gimanihong sakyanan nga Toyota Corrola (YCJ 570) kolor puwa sa Linao-Lipata, Minglanilla.

Matod ni Chief Inspector Roderick Gonzales, hepe sa kapulisan sa Naga kinsa karon lang semanaha nilingkod sa puwesto nga si Bolaño usa sa mga target sa kapulisan, apan wa siya mahibawo unsa nga rason.

Si Gonzales nibutyag nga niadtong Marso 8 padung na unta mobalik sa iyang pwesto si Aliganga sa Women and Children’s Protection Desk apan nakadawat siya og kamanduan nga idestino na siya sa Cebu Provincial Police Office (CPPO) kagahapon sa buntag.

Nananghid kaniya si Aliganga nga muadto sa Pag-ibig office ug iyang gituguta.

Hugtanon niyang gihimakak nga siya ang nagsugo ni Aliganga sa pag-adto sa Palawan Pawnshop diin nahitabo ang kremin.

Samtang si Chief Insp. Ver­niño Noserale, pangu sa kapu­lisan sa lungsod sa Minglanilla, niingon nga naa pa sila sa pag­susi kon aduna bay CCTV footage sa maong lugar aron makit-an ang dagway sa gunman. (DRT, AYB)