Osmeña nalipay sa mando ni Duterte sa hukom sa DOJ

NALIPAY ug gihangop ni Ma­yor Tomas Osmeña ang pa­­mahayag ni Presidente Ro­dri­go Duterte nga iyang ga­mi­­ton ang gahom isip pa­ngu­­lo sa pag-review sa nahiu­­na­ng desis­­yon sa Department of Justice (DOJ) nga nag­­-­­ab­­swelto sa gipasanginlang mga drug lord.

Sa pagawas sa balita diin gipakawaysala silang magpapatigayon Peter Lim, Kerwin Espinosa ug laing 18 ka pangalan, si Osmeña nisaway kang Justice Secretary Vitaliano Aguirre gumikan sa hukom sa ahensiya nga iyang gipangulohan.

“I’m really happy to hear that because Aguirre to me is very corrupt,” matod ni Osmeña.

Ang mayor nagkanayon kon husto ang desisyon sa DOJ, angay usab nila buhian si Senador Leila De Lima sanglit atol sa hearing sa Kongreso, giangkon ni Espinosa nga iyang gitagaan og kwarta ang senador.

Sa pagkakaron, ang DOJ nihimo na og panel nga maoy gitahasan sa pagsusi og balik sa kaso nga giatubang nilang Lim, Espinosa ug kaubanan.

Si Osmeña nihimo og sanglitanan sa mga kaso nga gihuptan sa DOJ ubos sa liderato ni Aguirre diin gipadayag sa mayor nga inay P50 milyones ang gi-suborno ni Jack Lam, usa ka Chinese nga gambling lord, gikuhaan kini og P1,000 aron di sila mag-atubang og kasong plunder.

Samtang, Criminal Investigation and Detection Group-7 mopadayon sa ilang imbestigasyon sa Sugboanong negosyante nga ginganlan ni President Rodrigo Duterte nga drug lord nga si Peter Lim human nga gi dismiss sa Department of Justice uban nilang Kerwin Espinosa ug laing mga drug personalities.

Si CIDG 7 Regional Chief Supt. Royina Garma nagka­nayon nga di mohunong ang ilang buhatan sa pagpangitag ebidensya kang Lim.

Usa sa ilang tan-awon kon aduna bay laing nalapas sa balaod si Lim sama sa pagbayad sa buluhisan. (PAC & AYB)