Saksi sa pagpatay sa managsuon mitumaw

HOMICIDE section sa Cebu City Police Office duna nay saksi sa pagpusil-patay sa managso-ong Ong niadtong Enero 27 sa kaadlawon samtang nag-inom kini sa usa ka bilyaran sa Barangay Punta Princesa, dakbayan sa Sugbo.

Matod ni Supt. Ryan Devaras nga bisan aduna na silay ngalan sa nagpusil-patay nilang Nick Benzen ug Neil Brian Ong apan wala pa sila makapasaka og kaso tungod niini kay wala silay saksi nga makatumbok sa suspek.

Ang saksi anaa na karon sa kustodiya sa Homicide Section ug andam na mohatag sa iyang pinanumpaang pamahayag alang na unya sa pagpasaka sa kaso ngadto sa korte.

Giingong nakakita ug nakaila usab ang maong saksi sa nagpatay sa managso-on nga makahatag na unya ug kalig-on sa kaso nga ilang ipasaka sa korte.

Giingon nga nahadlok ang maong saksi sa iyang siguridad nga maoy hinungdan nga nalangay ang iyang paghatag sa kasayuran sa kapulisan.

Gihulagway ni Col. Devaras nga usa ka gun for hire ang suspek diin duna usab ni mga kalambigitan sa mga patay nga nahitabo sa syudad sa Sugbo sa nanglabay nga mga buwan.

“Gun-for-hire ni ang gunman nya active pani sila hangtod karon, basta madakpan nato ni siya mahibaw-an na kinsa ang mastermind,” matod ni Supt. Ryan Devaras.

Usa sa mga gitan-aw nga motibo sa krimen mao ang personal nga atraso sa usa sa mga biktima nga si Nick Benzen nga dili pa nila ika-butyag sa pagkakaron.

Apan wala usab nila wad-a ang laing angulo sa maong krimen.

Sa niaging semana nanawagan og hustisya ang mga kabanay ug mga higala sa mga biktima, ilabi na ngadto sa kapulisan. (AYB)