Osmeña nasagmuyo sa DOJ; Meca nakugang sa desisyon

NASAGMUYO si Cebu Mayor Tomas Osmeña sa Department of Justice (DOJ) gumikan sa pagka-abswelto nilang Peter Lim, Kerwin Espinosa ug kaubanan sa gipasakang kaso sa ginadiling drugas sa Criminal Investigation and Detection Group (CIDG).

Ang mayor nihulagway kang Justice Secretary Vitaliano Aguirre nga maoy niguba sa reputasyon sa pamunoan ni Presidente Rodrigo Duterte labi na sa gubat batok sa illegal drugs.

Gumikan niini, gusto niya nga mapalagpot sa katungdanan ang kalihim sa DOJ.

“I just want Aguirre out, I think he is doing a desservice to the administration,” paghulagway ni Osmeña sa hukom sa DOJ.

Apan si Aguirre, sa iyang bahin, nagkanayon nga wa siyay kalambigitan sa pagpakanaog sa maong desisyon.

Matod niya nga di pa hingpit nga gipakawaysala silang Lim ug Espinosa sanglit mamahimo pang makaduso og motion for reconsideration ang CIDG o ipaubos sa automatic review ang ilang desisyon.

Samtang ang Cebu Provincial Anti-Drug Abuse Office (CPADAO) nakugang sa desisyon sa DOJ batok sa niangkong drug lord nga si Kerwin Espinosa.

Matod ni CPADAO Executive Director Ivy Meca nga nahibawo ang publiko labot sa kalambigitan niini sa illegal drugs human kini niangkon sa iyang illegal nga patigayon ug unsa ang pamaagi niini.

“As they said, it’s baseless. Pero kadaghanan gyud kahibalo nga mao na ilang duwa, especially Kerwin Espinosa,” niingon si Meca.

Ang hepe usab sa Criminal Investigation and Detection Group-7 wa mabalaka.

Matod ni Supt. Royina Garma, regional chief sa CIDG-7, nga bisan di sila ang nag imbestigar sa kaso ni Lim, nakakita siya sa affidavit ni Kerwin nga nagtumbok niini nga maoy iyang supplier sa drugas. (PAC, AZDL/dugang taho ni AYB)