Laing 132 nasikop sa Team

SAGAD sa madakpan nga motorcycle riders sa dakbayan sa Mandaue morason nga wa sila masayod sa bag-ong balaodnon nga gipatuman sa Siyudad nga nagdili sa driver lakip na ang angkas sa pagsul-ob og tainted helmets, bonnets ug facemasks.

Samtang moabot sa 132 ang mga nadakpan kagahapon hangtod sa mga alas 4:50 sa hapon.

Niadtong Lunes, unang adlaw sa pagpatuman, mitala ngadto sa 120 ang nasikop nga naghimong 252 sa tanang nakalapas nga nasikop.

Nagtinguha ang Traffic Enforcement Agency of Mandaue (TEAM) nga motaod og mga dagkong tarpaulin sa tanang entrance ug exit points sa siyudad nga nagpahibawo sa publiko kalabot sa gipatuman nga city ordinance.

Nagkanayon si Glenn Antigua, TEAM chief nga mihatag sila og igong panahon sa ilang information drive ngadto publiko.

Siya nipasidaan sa kadtong mga nagtuo nga naka-ipsot sila sa mga traffic police, enforcer ug tanod nga nipatuman sa maong ordinansa sanglit ang kuha diha sa CCTV cameras sa nagkadaiyang kalsada sa Mandaue ilang susihon ug mahimo gihapon nga maisyuhan og citation ticket nga magbase sa laing ordinansa nga “no contact apprehension policy.” (FVQ)