Alvarez gipikhan ni Osmeña sa pagdumili sa pagtaktak kang Gwen

GIHULAGWAY ni Mayor Tomas Osmeña nga nagbulingbuling sa dungog sa House of Representatives si Speaker Pantaleon Alvarez human siya nipadayag nga di niya ipatuman ang dismissal order sa Ombudsman batok sa Kongresista Gwendolyn Garcia.

Ang mayor nagkanayon nga sa gibuhat ni Alvarez, sama ra nga iyang gisuportahan ang pagpadayon sa graft and corruption sa gobiyerno.

Si Garcia gi-dismiss sa Ombudsman gumikan sa kasong grave misconduct sa iyang pagsud og kontrata tali sa supplier sa filling materials aron itabon sa Balili Property niadtong 2012 nga way pagtugot gikan sa Sangguniang Panlalawigan.

Ang House speaker nagkanayon nga di siya makapatuman sa kamanduan gikan sa Ombudsman sanglit wa kini malatid sa Batakang Balaod.

Dugang ni Alvarez nga bisan ang pagdisiplina way power ang Ombudsman ug labaw na ang pagtangtang sa usa ka kongresista ug kon iya kining himuon, iyang gihulagway nga nakalapas siya sa Constitution.

Iyang gipasabot nga nakabutang sa Batakang Balaod mao nga ang House of Representatives ra ang adunay gahom sa pagdisiplina o pagtangtang sa ilang sakop.

Apan si Osmeña nagkanayon nga gigamit lang ni Alvarez ang technicality sa balaod aron malutsan ang kamanduan sa Ombudsman.

“He is using a technical but he does not have the moral ascendancy. He did not defend the issue of graft and corruption and the way he made his decision, his body language supports graft,” padayag ni Osmeña kinsa nahimo usab nga kongresista niadtong 2010.

Dugang ni Osmeña nga kon modayon og lansar pagkagobernador si Garcia sa 2019, iya kining hangpon sanglit sa maong panahon adunay nay kahigayonan ang katawhan sa pag-reject sa kanhi gobernador.

Si Garcia nagtuo nga ang iyang kaaktibo sa impeachment batok kang Ombudsman Conchita Carpio-Morales ang hinungdan ning hukom batok niya. (PAC)