`Killer’ sa brgy. konsehal nasikop sa Leyte

NEGUSYANTE nga no. 1 most wanted sa lungsod sa Sogod sa lalawigan sa Sugbo tungod sa pagpatay sa konsehal sa barangay niadtong Marso 2017 nadakpan sa Leyte.

Si Sam Dapatan, 40, nasikop pinaagi sa warrant of arrest sa kasong murder tungod sa pagpusil patay sa usa ka barangay konsehal sa Sogod niadtong Marso 2017.

Si Pandapatan, 41, negosyante og mga selpon, accessories ug mga pisa sa selpon nasikop sa joint operation sa Bato Leyte Police Station Provincial Police office sa Police Regional Office (PRO 8), Regional Intelligence Unit (RIU) 8, Regional Intelligence Unit (RIU) 7 ug Sogod Police Station sa Cebu Police Provincial Police Office.

Si Pandapatan gidakop sa miaging buntag sa iyang tindahan sa Bato Terminal sa Brgy. Iniguihan, Bato, Leyte, pinasikad sa warrant of arrest sa kasong murder nga giisyu ni Judge Jerry Dicdican, sa Regional Trial Court (RTC) 7 Branch 25, sa dakbayan sa Danao.

Si Sr. Insp. Efren Diaz, Jr, hepe sa Sogod Police Station nga nahinabi sa Superbalita Cebu nibutyag nga si Pandapatan, maoy number 1 wanted sa ilang lungsod human gipusil patay niya niadtong Marso 2017 si Roberto Abalos, 50, sa konsehal sa Brgy. Damolog, lungsod sa Sogod.

Positibong giila si Pandapa­tan nga maoy nipusil patay kang Abalos samtang nagtan-aw og telibesyon sulod sa ilang balay sayo ning tuiga.

Ang anak ni Pandapatan giingong apil sa krimen.

Si Cruz nibutyag nga love triangle ang motibo sa krimen.

Giingon nga sila si Abalos ug ang kapuyo ni Pandapatan dunay relasyon hinungdan nga nasuko ang suspek ngadto sa iyang silingang opisyal.

Human sa pagpusil patay, nilayas si Pandapatan sa Bato, Leyte ug nipadayon sa iyang negosyo. (GPL)